ఈ యువతలో ఎక్కువ మంది ఆయా పార్టీల కార్యాలయాలలో పెంపుడు కుక్కపిల్లలుగా(ఎవరినో విమర్శించడానికి కాదు, ఒక్కసారి మీరే సందర్భాన్ని పరికించుకొని చూడండి) తయారయ్యారనేది చూస్తూనే ఉన్నాం. వాళ్లకు ఆయా పార్టీల విషయాలు తప్ప, దేశం గురించి ఆలోచించే కనీస విచక్షణ లోపిస్తుంది. అదే దేశానికి పెద్ద సమస్యగా పరిణమిస్తుంది. దేశంలో అత్యంత ఎక్కువగా యువత ఉన్నారు అన్నప్పుడు వాళ్ళు ఎంత కృషి చేస్తే అంత గొప్పగా దేశం ముందుకు వెళ్లేందుకు అవకాశం ఉంటుంది. అలాంటి సందర్భం ఇప్పుడు రెండు రకాలుగా వచ్చేసింది. ఒకటి యువభారతం(52%), రెండు దేశానికి ప్రపంచ వ్యాప్తంగా మంచి పేరు రావడం ద్వారా పెరిగిపోతున్న అంతర్జాతీయ అవకాశాలు. ఇవన్నీ త్వరితగతిన దేశాన్ని ముందుకు తీసుకెళ్లడానికి ఉపయోగపడే అద్భుత అవకాశాలు.
కానీ అవన్నీ ఒక్కక్షణం ఆగి ఆలోచించే పరిస్థితి నేటి యువతకు ఉన్నదా అన్నదే ఇక్కడ మరో ప్రశ్న. కనీసం దేశ పరిస్థితిని గురించి ఆలోచించలేకపోతే, అది తామే అధికంగా ఉన్న సమయంలో, అలాగే ఒక అద్భుత అవకాశం ఉన్న సమయంలో ఇలా పార్టీలను పట్టుకు తిరగడం లేదా అలాంటి మరొక దానిలో ఉండిపోవడం ఎంతవరకు సమంజసం. ఈ అవకాశాలను యువత మరియు ప్రభుత్వం ఉమ్మడిగా వాడుకుంటే కేవలం దశాబ్ద కాలంలో కొత్త భారతాన్ని రచించుకోవచ్చు. ఈ తరం అభివృద్ధి చెందిన భారతాన్ని చూసే వెళ్లిపోయే అద్భుత అవకాశం ఇది. రండి ప్రయత్నిద్దాం, దేశాన్ని, మనల్ని కూడా అభివృద్ధి పదం వైపుకు తీసుకుపోదాం!
