చాలామంది రోజూ తాగే పానీయం టీ. ఏటవాలుగా ఉన్న కొండ ప్రాంతాల్లో తేయాకు తోటల్లో పనిచేసే మహిళా కార్మికులు ఆకులను కోసి, వీపు మీద ఉన్న బుట్టల్లో వేసు కోవడం సినిమాల్లో చూస్తూనే ఉంటాం. టీ తోటలను కొండల్లో పెంచుతారని గమనించే ఉంటారు. అయితే ఈ తేయాకును కొండ ప్రాంతాల్లోనే ఎందుకు పెంచుతారో ఓ సారి చూసేద్దాం.

 

తేయాకు పంటకు స‌రైన‌ వర్షపాతం అవసరం. కానీ నీరు మాత్రం నిల్వ ఉండకూడదు. అందుకే ఏటవాలుగా ఉన్న కొండ ప్రాంతాలలోనే ఈ తేయాకును పండిస్తారు. మన దేశంలో అస్సాం రాష్ట్రం తేయాకు పేరు గాంచింది. ఈ తేయాకును ఎక్కువగా అక్కడే పండిస్తున్నారు. దక్షిణ భారతదేశంలోని కేరళ, నీలగిరి కొండల్లో కూడా తేయాకు తోటలు చాలానే ఉన్నాయి. ప్రపంచంలో తేయాకు ఉత్పత్తిలో, ఎగుమతిలో అగ్రస్థానంలో ఉన్న దేశాల్లో భారతదేశం ఒకటి.

 

అస్సాం టీ...

అస్సాం టీ ఇదో బ్లాక్‌ టీ భారతదేశంలోని అస్సాం లోని ప్రాంతం పేరు మీదుగా దీనికి ఆ పేరు వచ్చింది. బంగ్లాదేశ్‌, బర్మా (మయన్మార్‌) సరిహద్దుల్లో బ్రహ్మపుత్ర నది పరివా హక ప్రాంతంలో ఉన్న అస్సాం ప్రపంచంలోనే అత్యధికం గా చాయ్‌ పండించే ప్రదేశంగా పేరు గాంచింది. ఈ ప్రాంతంలో ఎక్కువ ఆర్ధ్రత ఉండటంతో పాటు వర్షాకాలంలో రోజుకి 10-12 అంగుళాల (250 300 మి.మీ) వర్షపాతం  నమోదవుతుందట. పగటి పూట ఉష్ణోగ్రతలు 103 ఫారెన్‌ హీట్‌ (40 డిగ్రీ సెంటి గ్రేడ్‌) వరకు ఉండటంతో ఎక్కువ వేడి, తేమ నెలకొని గ్రీన్‌ హవుస్‌ లాంటి పరిస్థితులు ఏర్పడ తాయి. ఈ తరహా వాతావరణ పరిస్థితులు అస్సాం ''టీ'' కి విశిష్ట రుచిని ఆపాదించాయి. అస్సాం చాయ్‌ని కామేలియా సినెన్సిస్‌ వార్‌ అస్సామికా (మాస్టర్స్‌) అనే మొక్క ద్వారా రూపొందుతుంది. సముద్రమట్టం ఎత్తులో పండించే ఈ తేనీరు తన విశిష్ట రుచి, సువాసన, పొడి బారుతనం, ఘాడత్వానికి ప్రసిద్ధి. అస్సాం టీ లేదా దాని ఉత్పత్తులను అల్పాహార  టీ గా విక్రయిస్తారు. దీన్ని ఇంగ్లీష్‌ బ్రేక్‌ ఫాస్ట్‌ టీ, ఐరిష్‌ బ్రేక్‌ ఫాస్ట్‌ టీ, స్కాటిష్‌ బ్రేక్‌ ఫాస్ట్‌ టీ అని కూడా పిలుస్తుంటారరు. ప్రధానంగా అస్సాం బ్లాక్‌ టీకి ప్రసిద్ధి కానీ ఇక్కడ దీంతో పాటు గ్రీన్‌, వైట్‌ టీల ను కూడా కొద్ది మొత్తంలో పండిస్తారు. వీటి రుచులు వీటికే ప్రత్యేకం.

 

చారిత్రకంగా చూస్తే టీ పొడి ఉత్పత్తులలో దక్షిణ చైనా తర్వాత‌ అస్సాందే రెండవ స్థానంలో ఉంది. ప్రపంచంలో దక్షిణ చైనా, అస్సాం ఈ రెండు ప్రాంతాలు మాత్రమే స్థానిక టీ మొక్కల కు ప్రసిద్ధి. 19వ శతాబ్దంలో చాయ్‌ తాగే అలవాట్లలో అస్సాం టీ విప్లవాత్మక మార్పులను తీసుకొచ్చింది. వేరువేరు మొక్కల ద్వారా రకరకాలైన రుచులు గల టీ పొడి ఉత్పత్తి అవడమే ఇందుకు కారణం.