సాధారణంగా దుస్తులు సరిగా ఎండకపోయినా, వంటింట్లో తడి ఆరకపోయినా ఒక రకమైన వాసన వస్తుంటుంది. అలాగే వర్షాలు కురిసిన ప్రతిసారీ ఇళ్లల్లోనూ తేమ చేరుతుంది. కొన్నిళ్లలో అల్మరాల్లో, గోడల్లో చెమ్మ ఏర్పడుతుంది. దీంతో ఆ దుర్వాసన బట్టలతో పాటు ఇల్లంతా వ్యాపిస్తుంది. ప్రతిసారీ రసాయనాలుండే ఎయిర్ ఫ్రెషనర్స్ను వాడడం వల్ల అలర్జీ వచ్చే ప్రమాదం ఉంటుంది. అయితే వంటింటి చిట్కాల ద్వారా ఆ వాసనని ఎలా పోగొట్టొచ్చో తెలుసుకుందాం..
- బట్టలను ఉతికిన తరువాత నీళ్ళలో కొంత నిమ్మరసం కలిపి, దుస్తులను అందులో ముంచి ఆరేయాలి. అలా చేయడం వల్ల బట్టల నుంచి దుర్వాసన రాదు. అలాగే, నిమ్మరసం కలిపిన నీటితో గదులను శుభ్రపరిస్తే దుర్వాసన రాకుండా ఉంటుంది.
- బ్యాక్టీరియాని నివారించడానికి వెనిగర్ బాగా పనిచేస్తుంది. ఒక ఖాళీ బాటిల్లో పావు భాగం వెనిగర్ పోసి, మిగిలిన భాగం నీటితో నింపాలి. ఈ ద్రావణాన్ని ఎయిర్ ఫ్రెషనర్గా వాడుకోవచ్చు.
- ఒక గిన్నెలో వెనిగర్ పోసి దానిలో కొన్ని బత్తాయి, నిమ్మ తొక్కలు వేసి, వంటింట్లో పెడితే దుర్వాసన పోతుంది.
- దుప్పట్లు, కార్పెట్ల వంటివి సరిగా ఎండకపోతే వాటిపై రాత్రిపూట కొద్దిగా బేకింగ్ సోడా చల్లాలి. పొద్దున్నే వాక్యూమ్ పెడితే చాలు వాటి నుంచి వచ్చే దుర్వాసన పోతుంది.
- ఉప్పును బట్టలో మూటలా కట్టి ఇంట్లో దుర్వాసన వచ్చే చోట ఉంచితే చాలు, ఎలాంటి దుర్వాసన అయినా దరిచేరదు.
- కొద్దిగా సోంపు, ఒక జాజికాయ, కొంచెం దాల్చినచెక్క, కొన్ని వెలుల్లి రెబ్బలు, బత్తాయి, నిమ్మ తొక్కలను ఒక గిన్నెలో వేసి, కొద్దిగా నీరుపోసి, గంటపాటు మరగబెట్టాలి. తరువాత దాన్ని చల్లార్చి, ఒక స్ప్రే బాటిల్లో పోసి, కావలసినప్పుడు వాడుకోవచ్చు.