తెలుగు సినిమా స్థాయిని పెంచిన ఎందరో సినీ దిగ్గజాలు తెలుగు వెండితెరకు ఎనలేని సేవలు చేశారు. అయితే, ఆ మహానటుల నిజ జీవితాలలో జరిగిన మనకు తెలియని ఎన్నో ఆసక్తికరమైన విషయాలు విశేషాలు మీ కోసం.
ముందుగా 'యస్వీ రంగారావు'గారు. ఎస్వీయార్ ప్రధాన పాత్రలో నటించిన 'బంగారు పాప' సినిమా అంతర్జాతీయ చలనచిత్రోత్సవంలో ప్రదర్శించారు. అయితే, ఆ చలనచిత్రోత్సవంలో 'బంగారు పాప' సినిమాని చూసిన 'చార్లి చాప్లిన్' ఎస్వీయార్ నటనకు ఫిదా అయిపోయారు. రంగారావు గారి నటనను 'చార్లి చాప్లిన్' ఆ స్టేజ్ పై ఎంతగానో కొనియాడారు.
సీనియర్ ఎన్టీఆర్.. నర్తనశాల సినిమా చేస్తోన్న రోజులు అవి. బృహన్నల పాత్రలో ఎన్టీఆర్ నటిస్తున్నారు. ఆ పాత్రకు న్యాయం చేయాలంటే..కూచిపూడి నాట్యాన్ని నేర్చుకోవాలి అనుకున్నారు ఎన్టీఆర్. ఐతే అప్పటికే ఎన్టీఆర్ వయసు 40 ఏళ్లు. ఆ వయసులో ఆయన వెంపటి చినసత్యం మాస్టారి వద్ద కూచిపూడి నాట్యాన్ని నేర్చుకున్నారు.
గుమ్మడి వెంకటేశ్వరరావు 'అర్ధాంగి' చిత్రాన్ని ఎంతో ప్రత్యేకంగా భావించేవారు. ఎందుకంటే.. 'అర్ధాంగి' చిత్రంలో గుమ్మడికి భార్యగా నటించిన శాంత కుమారి, నిజ జీవితంలో ఆయన కంటే 8 సంవత్సరాలు పెద్దవారు. అలాగే అదే చిత్రంలో గుమ్మడికి పెద్ద కుమారుడిగా నటించిన అక్కినేని నాగేశ్వరరావు గుమ్మడి కంటే 3 సంవత్సరాలు పెద్ద. ఇక గుమ్మడికి చిన్న కుమారుడిగా నటించిన జగ్గయ్య గుమ్మడి కంటే ఏడాది పెద్ద. అందరి కంటే చిన్నవాడిని.. అందరికీ పెద్దగా నటించడం నా ప్రత్యేకత అని గుమ్మడి ఎప్పుడు అంటుండేవారు.
