రేణు దేశాయ్.. తెలుగు ప్రేక్షకులకు పరిచయం అవసరంలేని పేరు. పవన్ కళ్యాణ్ మాజీ భార్యగా ఈమె గురించి అందరికీ తెలిసిందే. నటిగా, రచయితగా, దర్శకురాలిగా తన ప్రతిభను చాటుకున్న మహిళ రేణు దేశాయ్. ప్రస్తుతం మరాఠీలో దర్శకురాలిగా సినిమాలు చేస్తూ.. మరోవైపు తన ఇద్దరు పిల్లలను చూసుకుంటూ చాలా బిజీగా గడుపుతున్నారు రేణు. ఇన్‌స్టాగ్రామ్‌లో ఎప్పటికప్పుడు ఫొటోలు పోస్టు చేస్తూ అభిమానులకూ దగ్గరగానే ఉంటున్నారు. కామెంట్లతో తనను ఇబ్బంది పెట్టే నెటిజన్లపై కూడా ఇన్‌స్టాగ్రామ్ ద్వారానే రేణు విరుచుకుపడుతుంటారు. ఇలాంటి అనుభవం రేణు దేశాయ్‌కు తాజాగా మరోసారి ఎదురైంది. 


యూట్యూబ్‌లో అందుబాటులో ఉన్న ఒక వీడియో ఆధారంగా ఇటీవల రేణు దేశాయ్ సోషల్ మీడియాలో లైవ్ నిర్వహించినట్టు అర్థమవుతోంది. ఈ లైవ్ ఇంటరాక్షన్‌లో చాలా మంది రేణుని రకరకాల ప్రశ్నలు అడిగారు. దీనిలో భాగంగా బిగ్ బాస్ ప్రస్తావన కూడా వచ్చింది. ‘‘బిగ్ బాస్‌లోకి రావచ్చుగా మేడమ్’’ అని ఒక యూజర్ అడిగిన ప్రశ్నకు రేణు స్పందిస్తూ.. ‘‘నేను బిగ్ బాస్ కంటెస్టెంట్ టైపు వ్యక్తిని కాదు. లైవ్ కూడా ఎప్పుడో రెండు నెలలకు ఒకసారి చేస్తుంటాను. నాకు చాలా సిగ్గు ఎక్కువ’’ అని చెప్పారు. 


వెంటనే రేణు దేశాయ్ పక్కన ఉన్న మహిళ.. ‘‘వంద రోజులపాటు అకీరా, ఆద్యను వదిలిపెట్టి ఉండగలవా’’ అని అడిగారు. దీనికి రేణు స్పందిస్తూ.. ‘‘దీని గురించి చర్చే అవసరంలేదు. వాళ్లను వదిలిపెట్టి ఒక్కరోజు కూడా ఉండలేను. కంటెస్టెంటుగా కాకపోయినా 24 గంటలపాటు అతిథిగా అయినా వెళ్లొచ్చు కదా అని అడుగుతున్నారు. కానీ, నేను అలాంటి వ్యక్తిని కాదు. కెమెరా ముందు 24 గంటల పాటు మాట్లాడుతూ ఉండలేను. ఈ లైవ్‌కు కూడా చాలా సిగ్గుపడుతూ వస్తుంటాను’’ అని వివరణ ఇచ్చారు. 


అంతకు ముందుకు ఒక యూజర్ ‘‘మీరు మాట్లాడే తెలుగు చాలా క్యూట్‌గా ఉంది మేడమ్’’ అని కామెంట్ చేశారు. దీనికి రేణు స్పందిస్తూ.. ‘‘నాకు తెలుగు మాట్లాడాలంటే భయమేస్తుంది. ఏదైనా తప్పు మాట్లాడతానేమోనని. కానీ, ఏ ఊరులో ఉంటే ఆ భాష మాట్లాడాలి. రోమ్‌లో ఉంటే రోమన్‌లానే ఉండాలి. తెలుగు నేలపై ఉంటే తెలుగులో మాట్లాడాలి. తెలుగు ఇండస్ట్రీకి వచ్చి నేను తెలుగు మాట్లాడను, నేను ఇంగ్లిష్‌లోనే మాట్లాడతాను అంటే బాగుండదు’’ అని వెల్లడించారు. 


అయితే, ఒక యూజర్ అడిగిన ప్రశ్న రేణు దేశాయ్‌కు కోపం తెప్పించింది. ఆ ప్రశ్నను ఆమె బయటికి చదవకపోయినా.. ఆ యూజర్‌పై మాత్రం ఆగ్రహం వ్యక్తం చేశారు. ‘‘మీకు బుద్ధిలేదు. లైవ్‌లో కొంచెం ఆలోచించి టైప్ చేయండి. బుద్ధిలేకుండా వచ్చేస్తారు. చెత్త ప్రశ్నలు టైప్ చేస్తారు’’ అంటూ నవ్వుతూనే క్లాస్ పీకారు. 


మరింత సమాచారం తెలుసుకోండి: