మాస్ మహారాజ ర‌వితేజ.. ఈయ‌న గురించి ప్ర‌త్యేకంగా ప‌రిచ‌యాలు అవ‌స‌రం లేదు. మ‌నం ఎంచుకున్న రంగంలో అవకాశం రావాలంటే ముందు అందులో ఏదో ఓ విధంగా దూరిపోవాలి. అదే చేశాడు ర‌వితేజ‌. తనకిష్టమయిన సినిమా ఇండస్ట్రీకి హీరో కావాల‌ని వ‌చ్చిన ర‌వితేజ ముందు చిన్న చిన్న పాత్ర‌లు చేస్తూ.. ప్రముఖ దర్శకుడు కృష్ణవంశీ వద్ద అసిస్టెంట్ డైరెక్టర్‌గా చేరారు. ఈ క్ర‌మంలోనే ప‌లు సినిమాల‌కు అసిస్టెంట్ డైరెక్టర్‌గా ప‌ని చేశాడు. కొనాళ్లకి 'నీకోసం' సినిమాతో హీరో అయ్యాడు. శ్రీ‌ను వైట్ల ద‌ర్శ‌క‌త్వంలో వ‌చ్చిన ఈ చిత్రం ర‌వితేజ‌కు మంచి పేరు తెచ్చిపెట్టింది. ఆ చిత్రంలో ర‌వితేజ నటనకు పలువురి ప్రశంసలు లభించడమే కాకుండా అవార్డు కూడా లభించింది. 

ఆ త‌ర్వాత పూరీ జగన్నాథ్ దర్శకత్వంలో ఇట్లు శ్రావణి సుబ్రహ్మణ్యంలో హీరోగా చేయగా సూపర్ హిట్ అయి హీరోగా గుర్తింపు వచ్చి `ఇడియట్` సినిమాతో సెటిల్ అయ్యాడు. ఇక ఆ త‌ర్వాత ర‌వితేజ వెన‌క్కి తిరిగి చూసుకోలేదు. ఎలాంటి బ్యాక్ గ్రౌండ్ లేకుండా.. మంచి మంచి క‌థ‌ల‌ను ఎంపిక చేసుకుంటూ అంచెలంచెలుగా ఎదిగిన ర‌వితేజ ఎంద‌రికో స్పూర్తి. అమ్మా నాన్న ఓ తమిళమ్మాయి, డాన్ సీను, కిక్, విక్రమార్కుడు, కృష్ణ, వెంకీ, భద్ర, బలాదూర్, బలుపు, పవర్, దరువు, దుబాయ్ శీను, నా ఆటోగ్రాఫ్, శంభో శివ శంభో, అమ్మ నాన్న ఓ తమిళమ్మాయి, అవును వాళ్ళిద్దరు ఇష్టపడ్డారు, ఇట్లు శ్రావణి సుభ్రమణ్యం, లాంటి భారీ విజయాలతో టాలీవుడ్ ఇండ‌స్ట్రీలో త‌న‌కంటూ ఓ ప్ర‌త్యేక‌మైన ఇమేజ్ ఏర్ప‌ర్చుకున్నాడు.

అయితే ప్ర‌స్తుతం ప‌రిస్థితులు అలా లేవ‌నే చెప్పాలి. మాస్ మహారాజా రవితేజ హిట్ కొట్టి చాలా కాలమైంది. లేటెస్ట్ గా వచ్చిన డిస్కో రాజాకు కూడా యావరేజ్ రేటింగులే వచ్చాయి. ప్రస్తుతం ఈయన గోపిచంద్ మలినేని దర్శకత్వంలో `క్రాక్` సినిమా చేస్తున్నాడు. ఈ సినిమాలో రవితేజ పోలీస్‌ ఆఫీసర్‌ పాత్రలో కనిపించనున్నాడు. ఇక ఈ సినిమా విజయం సాధిస్తే తప్ప రవితేజ కెరీర్ కు మంచి రోజులు రావంటున్నారు కొంద‌రు. ఒక రకంగా చెప్పాలంటే గోపీచంద్ సినిమా రవితేజ కు డు ఆర్ డై లాంటిది. కచ్చితంగా విజయం సాధించాల్సిందే అన్న చందంగా ఉందంటున్నారు విశ్లేష‌కులు.