హృదయకాలేయం అనే సినిమాతో టాలీవుడ్ లో అడుగుపెట్టి తన విచిత్రమైన స్టైల్ మరియు మేనరిజమ్స్ తో బ‌ర్నింగ్ స్టార్ గా తెలుగు ప్రేక్షకుల్లో ఒక ప్రత్యేక గుర్తింపు పొందిన నటుడు సంపూర్ణేష్ బాబు. ఆయన నుండి సినిమా వస్తుందంటే అభిమానుల్లో కొత్త ఉత్సాహం వస్తుంది. సెటైరికల్ సినిమాలతో టాలీవుడ్‌లో కొత్త ట్రెండ్‌ను సృష్టించిన హీరో సంపూ. ఆయ‌న న‌టించిన‌ ‘హృద‌య‌కాలేయం’, ‘కొబ్బరిమ‌ట్ట’ చిత్రాలు బాక్సాఫీసు వద్ద విజయవంతం అయ్యాయి. ‘కొబ్బరిమట్ట’ తరవాత మరో సినిమాతో ప్రేక్షకుల ముందుకు రాలేదు సంపూ. దీనికి ఒక కారణం లాక్‌డౌన్ కూడా. లాక్‌డౌన్ త‌రువాత సంపూర్ణేష్ బాబు న‌టించిన చిత్రం శ‌ర‌వేగంగా షూటింగ్ జ‌రుపుకుంటుంది. ఈ చిత్రానికి ‘బ‌జార్ రౌడీ’ అనే టైటిల్‌ని ఖ‌రారు చేశారు.


ఈ చిత్రానికి వసంత నాగేశ్వరావు దర్శకత్వం వహిస్తున్నారు. కె‌ఎస్ క్రియేష‌న్స్ బ్యాన‌ర్‌‌పై నిర్మాత సందిరెడ్డి శ్రీనివాస‌రావు ఈ చిత్రాన్ని నిర్మిస్తున్నారు. ఈ చిత్రంలో సంపూర్ణేష్ బాబుకి జోడీగా మ‌హి న‌టిస్తుంది. ప్రస్తుతం ఈ సినిమా షూటింగ్ శరవేగంగా జరుగుతోంది. తాజాగా రామోజీ ఫిలిం సిటీలో ఒక పాటను చిత్రీకరిస్తున్నారు. ఈ పాటకు ప్రముఖ కొరియోగ్రాఫర్ ప్రేమ్ రక్షిత్ కొరియోగ్రఫీ అందిస్తున్నారు. ‘ఛ‌త్రప‌తి, విక్రమార్కుడు, య‌మ‌దొంగ, ప‌రుగు, మ‌గ‌ధీర‌, ఆర్య-2, డార్లింగ్‌, సింహ‌, మ‌ర్యాద‌ రామ‌న్న, 100% ల‌వ్‌, బృందావ‌నం, కందిరీగ‌, పూల‌రంగ‌డు, ఇష్క్‌, ర‌చ్చ, సీత‌మ్మ వాకిట్లో సిరిమ‌ల్లె చెట్టు, బాహుబ‌లి, రంగ‌స్థలం’ లాంటి ఎన్నో బ్లాక్‌ బ‌స్టర్ మూవీస్‌కే కాకుండా త‌మిళంలో ‘మార్షల్‌, వీరం, శ‌గుని, వేలాయుదం’ లాంటి సూప‌ర్ హిట్ చిత్రాల‌కి, సూప‌ర్‌ స్టార్స్‌కి కొరియోగ్రఫి అందించారు ప్రేమ్ రక్షిత్. ఇప్పుడు ఈయన ‘బ‌జార్ రౌడీ’తో అదిరిపోయే స్టెప్పులు వేయిస్తున్నారు.


ఈ పాట గురించి ద‌ర్శకుడు వ‌సంత నాగేశ్వరావు మాట్లాడుతూ.. ‘‘ఎంతో బిజీగా ఉండి ఎన్నో బ్లాక్‌ బ‌స్టర్ ఫిలింస్‌కి కొరియోగ్రాఫర్‌గా ప‌నిచేసి ఆ చిత్రాల గ్రాఫ్‌ని మార్చేసిన ప్రేమ్ ర‌క్షిత్ మాస్టర్ మా చిత్రంలో మా ‘బ‌జార్ రౌడీ’తో స్టెప్స్ వేయించినందుకు ఆయ‌న‌కి హృద‌య‌పూర్వక ధ‌న్యవాదాలు. ఈ సాంగ్ ప్రస్తుతం రామోజీ ఫిల్మ్‌ సిటీలో 20 మంది డాన్సర్లతో హీరో సంపూర్ణేష్ బాబు, మ‌హిపై చిత్రీక‌రిస్తున్నాం. ఈ చిత్రానికి సంబంధించిన టాకీ పూర్తిచేసాం. త్వర‌లో క్లైమాక్స్, మ‌రో రెండు సాంగ్స్‌తో షూటింగ్ పూర్తవుతుంది. ఈ చిత్రానికి ‘బ‌జార్ రౌడీ’ అనే టైటిల్ అనుకున్న వెంట‌నే మా యూనిట్ అంద‌రి ద‌గ్గర‌ నుండి చాలా మంచి రెస్పాన్స్ రావ‌టం మాలో కొత్త ఉత్సాహాన్ని నింపింది. మా నిర్మాత సందిరెడ్డి శ్రీనివాస‌రావు గారు బ‌డ్జెట్ విష‌యంలో ఎక్కడా లిమిటేష‌న్ పెట్టకుండా చిత్రాన్ని నిర్మిస్తుంటే మా ఎగ్జిక్యూటివ్ ప్రొడ్యూస‌ర్ శేఖ‌ర్ గారు త‌న అనుభ‌వంతో ఎక్కడ ఖ‌ర్చుపెడితే స్క్రీన్ మీద క‌న‌బ‌డుతుందో చ‌క్కటి ప్లానింగ్‌తో ముందుకు వెళ్తున్నారు. ఈ చిత్రంలో ముఖ్యమైన పాత్రల్లో షాయాజీ షిండే, 30 ఇయ‌ర్స్ పృథ్వి, నాగినీడు, ష‌ఫి, జీవా, స‌మీర్‌, మణిచంద‌న‌, న‌వీన‌, ప‌ద్మావ‌తి, కత్తి మహేష్ నటిస్తున్నారు. ఈ చిత్రం ఫస్ట్ లుక్‌, టీజ‌ర్ త‌దిత‌ర వివ‌రాలు అతి త్వర‌లో తెలియ‌జేస్తాం’’ అని అన్నారు. కాగా, ఈ చిత్రానికి మరుధూరి రాజా మాటలు రాశారు. ఎ. విజయ్ కుమార్ సినిమాటోగ్రఫీ అందిస్తున్నారు. సాయి కార్తీక్ సంగీతం సమకూరుస్తున్నారు. జాషువా ఫైట్స్ కంపోజ్ చేస్తున్నారు. అతి త్వరలో విడుదల కానున్న ఈ చిత్రం ఖచ్చితంగా సంపూ అభిమానులను అలరించాలని ఆశిద్దాం.

మరింత సమాచారం తెలుసుకోండి: