ఈ చిత్రంలో రామ్ చరణ్ కూడా ఓ ప్రత్యేక పాత్రలో నటిస్తున్నారు. రామ్ చరణ్ ఈ చిత్రంలో సిద్ద అనే క్యారెక్టర్ చేస్తున్నాంటూ కొణిదెల ప్రొడక్షన్ కంపెనీ ఇటీవల ఓ ఫొటోను విడుదల చేసింది. ఈ ఫొటో బట్టి రామ్ చరణ్ క్యారెక్టర్ ఏ విధంగా ఉంటుందో అర్థం చేసుకోవచ్చు. రామ్ చరణ్ ఆచార్య షూటింగ్లో పాల్గొన్నారంటూ చిత్ర యూనిట్ పోస్ట్ పెట్టింది. ఇదిలా ఉంటే.. మరోపక్క దర్శకధీరుడు, జక్కన్న రాజమౌళి కూడా మంగళవారం ఓ పోస్ట్ పెట్టారు. ఆర్ఆర్ఆర్ క్లైమాక్స్ షూటింగ్ మొదలైందని, రామరాజు, భీం ఏదైతే సాధించాలని అనుకున్నారో దాన్ని నెరవేర్చేందుకు ఇద్దరూ ఒకటయ్యారంటూ రాజమౌళి తన పోస్ట్లో రాసుకొచ్చారు. ఈ పోస్ట్ చూసిన తరువాత రామ్ చరణ్ అభిమానులకు ఒకటే డౌట్ వస్తోంది.
రామ్ చరణ్ ఒకేసారి రెండు షూటింగ్లలో ఎలా పాల్గొంటున్నారని వారంతా ఆశ్చర్యపోతున్నారు. ఈ రెండు షూటింగుల్లో ఒకటి పగలు పూట జరుగుతుండగా.. మరొకటి రాత్రి సమయాల్లో జరుగుతోందట. రామ్ చరణ్ ఉదయం ఒక షూటింగ్లో రాత్రి మరో షూటింగ్లో పాల్గొంటున్నారని మెగా కాంపౌండ్ నుంచి సమాచారం అందుతోంది. ఆచార్యలో రామ్ చరణ్ రోల్ చిన్నదే కావడంతో వారం నుంచి పది రోజుల్లోనే ఈ చిత్రంలో తన పార్ట్ పూర్తి కానున్నట్టు తెలుస్తోంది. ఆ తర్వాత తన పూర్తి సమయాన్ని ఆర్ఆర్ఆర్ చిత్రానికే రామ్ చరణ్ కేటాయించనున్నారు.