ఈ సినిమాలో హీరోహీరోయిన్ల మధ్య నడిచే ప్రేమ.. ప్రేక్షకుడికి కొత్తగా అనిపిస్తుంది. ఒకరినొకరు చూసుకోకుండానే.. ఇరువురి ఇష్టాఇష్టాలను ఒకరికి ఒకరు గౌరవించుకోవడం, తమను తాము మార్చుకోవడం, చివరికి ప్రేమలో ఉన్నామని తెలుసుకుని ఒక్కటి కావడం.. ఇలా సినిమాలో ఓ చక్కటి సున్నితమైన ప్రేమను డైరెక్టర్ వంశీ తెరకెక్కించాడు. ఇక హీరోహీరోయిన్ల పాత్రల్లో రవితేజ, కల్యాణిలు కూడా చాలా చక్కగా ఇమిడిపోయారు. సహజంగా అనిపించే వారి నటన సినిమాకు మరో ప్లస్ పాయింట్.
ఇక సినిమాలో లవ్ ట్రాక్‌తో పాటు వంశీ మార్క్ కామెడీ కూడా ఉంటుంది. కాలనీలోని ప్రతి ఒక్కరితో హాస్యం పండించాడు డైరెక్టర్. డబ్బుల కోసం ఒకే గదిని ఇద్దరికి అద్దెకిచ్చి వారిద్దరూ కలవకుండా కాపాడే పాత్రలో సత్యానందం(జీవా), తన వింత ప్రవర్తనతో సత్యానందాన్ని ఇబ్బందులు పెడుతూ ఉండే బావమరిది(కృష్ణ భగవాన్) ప్రేక్షకులను తెగ నవ్విస్తారు. బట్టలు ఉతికి ఇస్త్రీ చేసే మల్లికార్జునరావు కాలనీలో అందరికీ ఐడియాలు అమ్ముతూ ఉంటాడు. పొట్టిరాజు (కొండవలస లక్ష్మణరావు) భార్య దగ్గర మెప్పు పొందాలని రకరకాల వ్యాపారాలు చేసి ఏవీ కుదరక భార్య చేత చీవాట్లు తింటుంటాడు. అందుకే ఇప్పటికీ ఈ సినిమా ఓ క్లాసికల్ హిట్‌గా ప్రజల మదిలో నిలిచిపోయింది.
