తాప్సీ పన్ను.. ఝుమ్మంది నాదం సినిమాతో టాలీవుడ్ లో ప్రవేశించింది. కానీ ఆశించిన స్థాయిలో విజయాలు మాత్రం సొంతం చేసుకోలేకపోయింది. ఇప్పడు ఉత్తరాదిన అడుగుపెట్టి తన తలరాతను తానే మార్చుకుంటోంది. 2016లో పింక్ సినిమాతో అద్భుత విజయాన్ని అందుకొని తనకంటూ ప్రత్యేక గుర్తింపు తెచ్చుకుంది ఈ అమ్మడు. ఇంకేముందీ బాలీవుడ్ స్టార్ హీరోయిన్ ల సరసన చేరిపోయింది. తాప్సీ తెలుగు మాత్రమే కాదు.. తమిళ, మళయాళ చిత్రాల్లో కూడా తన అదృష్టాన్ని పరీక్షించుకుంది.
స్వస్థలం ఢిల్లీనే అయినా తాప్సీ మాత్రం న్యూజిలాండ్ లో పుట్టింది. ఆగస్ట్ 1వ తేదీన 1987వ సంవత్సరం.. మోహన్ సింగ్, నిర్మల్జిత్ దంపతులకు జన్మించింది. దేశ రాజధానిలోని మాతా జై కౌర్ పబ్లిక్ స్కూల్ లో స్కూల్ విద్యను కంప్లీట్ చేసింది. వెంటనే గురు తేగ్ బహదూర్ ఇనిస్టిట్యూట్ ఆఫ్ టెక్నాలజీలో కంప్యూటర్ సైన్స్ ఇంజినీరింగ్ విజయవంతంగా పూర్తి చేసి పట్టా అందుకుంది. ఆ తర్వాత కొద్ది రోజుల పాటు సాఫ్ట్ వేర్ ఇంజినీర్ గా పనిచేసింది.
కానీ ఆమె గోల్ అది కాదు. మోడల్ అవ్వాలని చిన్ననాటి నుండి కలలు కనేది. ఒక వైపు ఉద్యోగం చేస్తూనే ఆడిషన్స్ కు అటెండ్ అయ్యేది తాప్సీ. అలా ఓ టాలెంట్ షోలో ప్రదర్శన ఇచ్చి ఫుల్ టైమ్ మోడల్ గా సెలక్ట్ అయిపోయింది. ఇంకేముందీ సాఫ్ట్ వేర్ ఉద్యోగానికి ఫుల్ స్టాప్ పెట్టేసింది. ఆ తర్వాత పలు ప్రకటనల్లో యాక్ట్ చేసింది. పలు అందాల పోటీల్లో మెరిసి పురస్కారాలు సొంతం చేసుకుంది. రానురాను తాప్సీకి మోడలింగ్ పై ఆసక్తి సన్నగిల్లింది. సినిమా అవకాశాలపై దృష్టి సారించింది. అలా దర్శకేంద్రుడు రాఘవేంద్ర రావు కళ్లల్లో పడి.. ఝుమ్మంది నాదం చిత్రంలో హీరోయిన్ గా అవకాశాన్ని పొందింది తాప్సీ. 2010లో వచ్చిన ఈ చిత్రం పెద్దగా సక్సెస్ కాకపోయినా.. సొట్టబుగ్గల సుందరికి మాత్రం మంచిపేరే వచ్చింది. ఆ తర్వాత వరుసగా ఏడు చిత్రాల్లో నటించింది. తమిళంలో ధనుష్ తో ఆడుకాలమ్ లో జోడీ కట్టి హిట్ కొట్టింది. మళయాళంలో మమ్ముట్టి హీరోగా వచ్చిన డబుల్స్ చిత్రంలో ఆయన సరసన నటించి భేష్ అనిపించుకుంది. ఆ తర్వాత తెలుగులో దరువు అనే చిత్రంలో యాక్ట్ చేసి పర్వాలేదనిపించింది.
చాష్మే బద్దూర్ సినిమాతో హిందీలో అడుగు పెట్టేసింది ఈ అమ్మడు. బాక్సాఫీస్ దగ్గర ఆచిత్రం బద్దలు కొట్టడంతో తాప్సీకి అవకాశాలు వెల్లువెత్తుతున్నాయి. పింక్ చిత్రం ఆమెను స్టార్ హీరోయిన్ ను చేసింది.
