శేఖ‌ర్ సినిమాల్లో ఉన్న‌వన్నీ ఈ సినిమాలోనూ ఉంటాయి. అందులో డౌటే లేదు. ఆయ‌న సినిమా లో న‌రుక్కోవ‌డాలు, పొడుచు కోవ‌డాలు, అరుచుకోవ‌డాలు అన్న‌వి ఉండ‌వు.. అస‌లు ఆ త‌ర‌హా క‌త్తీ డాలూ అవ‌స‌ర‌మే లేదు ఆయ‌న‌కు. సున్నిత భావోద్వేగాలు ఉంటాయి. ఆశ నిరాశ సంవాదాలు ఉంటాయి. వాటితో ఆయ‌న మాట్లాడిస్తాడు. ఆ వాదం ఎవ‌రు తప్పు ఎవ‌రు ఒప్పు అన్నది చెప్పించేందుకు ప్ర‌య‌త్నిస్తాడు. ఆఖ‌రిగా కథ చాలా మంది మ‌న‌సుకు ద‌గ్గ‌ర‌య్యేలా ఎండ్ అయిపోతుంది. చుట్టూ ఉన్న మ‌నుషుల నుంచి వ‌చ్చే క‌థ‌లు బాగుంటాయి. వాటికి హైద్రాబాద్ ఫ్లేవ‌ర్ ఉంటుంది. ఇరానీ ఛాయ్ ఫ్లేవ‌ర్ కూడా ఉంటుంది. అవును! అలాంటి క‌థే లవ్ స్టోరీ కూడా! అయి ఉంటుంది. ఉండాలి కూడా! ఆనంద్, గోదావరి అలాంటి క‌థ‌లే. సినిమాను ఒప్పించే క్ర‌మంలో ఆయ‌న ఎవ్వ‌రి ద‌గ్గ‌ర‌కూ వెళ్ల‌డు. కథ రాసుకున్నాక తన శైలిని దాటి సినిమా తీయ‌డు. ఈ రెండూ ఆయ‌న‌కు బాగా ఇష్టం అయిన ప‌నులు. వీలున్నంత వరకూ సొంత బ్యాన‌ర్ లో నే సినిమాలు. అమిగోస్ తోనే సినిమాలు తీశాడు. రేప‌టి వేళ తీస్తాడు కూడా.. సునీల్ నారంగ్ లాంటి వారు ఆయ‌న‌కు ఇవాళ వచ్చిన కొత్త సపోర్టు. అంతే ఆయ‌నేం మార‌డు. మారాల‌ని భావించ‌డు. త‌న‌కు తెలిసిన క‌థ‌లు, త‌ను చెప్పాల‌నుకున్న క‌థ‌ల్లో బెస్ట్ ఇచ్చి వెళ్లాలి. వెళ్తాడు కూడా!
