టాలీవుడ్ లో మారుతి దర్శకత్వంలో వచ్చిన భలే భలే మగాడివోయ్ సినిమా తర్వాత నేచురల్ స్టార్ నాని జాతకం మొత్తం మారిపోయిందనే చెప్పాలి. పట్టిందల్లా బంగారం అన్నట్లు ఆయన నటించిన ప్రతి సినిమా సూపర్ హిట్ కావడమే కాదు నిర్మాతలకు లాభాల పంట పండించాయి. వరుసగా హిట్స్ అందుకుంటున్న నాని ద్విపాత్రాభినయంలో నటించిన ‘కృష్ణార్జున యుద్దం’ కాస్త నిరాశ పరిచింది. ఆ తర్వాత నాగార్జున, నాని మల్టీస్టారర్ గా నటించిన ‘దేవదాసు’ కూడా ఆశించిన ఫలితాన్ని ఇవ్వలేక పోయింది.
దాంతో కాస్త నిరాశకు లోనైన నాని ఓ ప్రయోగాత్మక పాత్రలో నటించారు..అదే ‘జెర్సీ’. ఈ మూవీ సూపర్ డూపర్ హిట్ అయ్యింది..దాంతో నాని ఈజ్ బ్యాక్ అన్నారు. ఆ సినిమా షూటింగ్ జరుపుకుంటున్న సమయంలోనే ‘మనం’ ఫేమ్ విక్రమ్ కుమార్ దర్శకత్వంలో ‘గ్యాంగ్ లీడర్’ సినిమాలో నటించారు. ఈ మూవీ గురించి పెద్ద పెద్ద అంచనాలు ఏవీ తీసుకు రాకుండా తన పని తాను చేసుకుంటూ పోయారు చిత్ర యూనిట్. కానీ, కంటెంటె బాగుంటే ఏ సినిమా అయినా గుండెలకు హత్తుకుంటారు తెలుగు ప్రేక్షకులు..ఇప్పుడు ‘గ్యాంగ్ లీడర్’ పరిస్థితి అంతే.
రిలీజ్ అయిన మొదటి షోనే మంచి హిట్ టాక్ తెచ్చుకుంది. ఈ యేడాది మొదట్లో అనీల్ రావిపూడి దర్శకత్వంలో వెంకటేష్, వరుణ్ తేజ్ నటించిన ‘ఎఫ్ 2’ కామెడీ జోనర్ లో తెలుగు ప్రేక్షకుల మనసు దోచింది. ఆ తరహా సినిమాల కోసం ఎదురు చూస్తున్న ప్రేక్షకులకు ‘గ్యాంగ్ లీడర్’తో ఆ కరువు తీరిందని అంటున్నారు ప్రేక్షకులు. ఇక ఈ ఎనిమిది నెలల్లో వచ్చిన సినిమాల్లో మహేష్ బాబు నటించిన ‘మహర్షి’ మినహా ఏదీ పెద్దగా హిట్ టాక్ తెచ్చుకోలేకపోయాయి.
విక్రమ్ కుమార్ దర్శకత్వంలో నాని హీరోగా నటించిన ‘గ్యాంగ్ లీడర్’ ఈ యేడాది విన్నర్ గా నిలిచిందని చెప్పడంలో అతిశయోక్తి లేదు. రిలీజ్ అయిన అన్ని కేంద్రాల్లో ఫస్ట్ టాక్ మూవీ ద బెస్ట్ అంటున్నారు. ఎలాంటి హంగామా లేకుండా..ఓ రివేంజ్ స్టోరీ కామెడీ, థ్రిల్లర్ రావడం ప్రేక్షకులను కట్టిపడేసింది.
