ఏపీ ఉప ముఖ్యమంత్రి పాముల పుష్ప శ్రీవాణి కులం మరోసారి వివాదాస్పదం అవుతోంది. ఆమె ఎస్టీ అన్న సంగతి తెలిసిందే. ఎస్టీ మహిళ అనే కోణంలోనే జగన్ గిరిజనులకు ప్రాధాన్యం ఇవ్వాలన్న లక్ష్యంతో ఆమెకు ఉప ముఖ్యమంత్రి పదవి అప్పగించారు. అయితే ఇప్పుడు ఆమె కులమే వివాదస్పదం అవుతోంది. ఇటీవల ఆమె అక్కను ఉపాధ్యాయ ఉద్యోగం నుంచి తొలగించారు. ఇందుకు కులమే కారణం అంటూ ప్రచారం జరుగుతోంది. అక్కకు ఉద్యోగం నుంచి తొలగించినా.. అదే కులం ఉప ముఖ్యమంత్రికి ఎలా వర్తిస్తుందంటూ ప్రచారం చేస్తున్నారు.

ఈ నేపథ్యంలో స్వయంగా  ఏపీ ఉప ముఖ్యమంత్రి పాముల పుష్ప శ్రీవాణి స్పందించారు. తన కులంపై కావాలనే కొందరు దుష్ప్రచారం చేస్తున్నారని ఆవేదన వ్యక్తం చేశారు. నూటికి నూరు శాతం తాను ఎస్టీ కొండ దొర కులానికి చెందిన వ్యక్తిని అన్నారు. తన సోదరి స్పెషల్‌ డీఎస్సీ పోస్టును వెనక్కి తీసుకోవడంపై ఆమె స్పందించారు. ‘‘నాన్ లోకల్ కారణంగానే మా సోదరికి స్పెషల్ డీఎస్సీలో పోస్టు వెనుకకి తీసుకున్నారు. కులం కారణం కాదు. ఏ విషయం మీద తొలగించారన్నది ఎందుకు మీరు చెప్పడం లేదు అని ఆమె నిలదీశారు.


2014 ఎన్నికల్లో నామినేషన్ దాఖలు చేసినప్పుడు ఎమ్మార్వో ఇచ్చిన కుల ధృవీకరణ పత్రాన్ని సమర్పించినందుకు రిటర్నింగ్ అధికారికి అనర్హత వేటు వేయాలని తనపై  కొందరు ఫిర్యాదు చేశారని  పుష్ప శ్రీ వాణి వివరించారు. అయితే, ఎస్టీ కుల ధృవీకరణ పత్రం ఆర్డీవో కాకుండా ఎమ్మార్వో ఇవ్వచ్చొన్న నిబంధన ఉందని… ఇదే విషయం సంబంధిత రిటర్నింగ్ అధికారి వద్ద నుంచి లిఖిత పూర్వకంగా తీసుకున్నాం. దీనిపై విచారణ జరుగుతుంది. నిజాలు త్వరలోనే తేలుతాయని పుష్ప శ్రీవాణి అంటున్నారు.

రాజకీయంగా కొందరు నాపై ఆరోపణలు చేస్తున్నారే తప్ప.. వాళ్లకీ తెలుసు నేను ఏ తప్పు చేయలేదని. కానీ అబద్దాన్ని పది సార్లు చెప్పి నిజం అనిపించాలని ప్రయత్నం చేస్తున్నారు. న్యాయం నావైపే ఉంటుందని ఆశిస్తున్నాను  అంటున్నారు ఉప ముఖ్యమంత్రి పుష్ప శ్రీ వాణి. మరి ఈ విచారణ వ్యవహారం చివరకు ఏం తేలుస్తుందో చూడాలి.

మరింత సమాచారం తెలుసుకోండి: