భవిష్యత్తులో తాము కూడా రాజకీయ నాయకులుగా ఎదిగేందుకు ఇప్పటినుంచే పునాదులు వేసుకుంటాము అన్నట్లుగా అనంతపురం జిల్లాలోని కొందరు పోలీసుల వ్యవహార శైలి ఉందన్న చర్చ కూడా జరుగుతోంది. ఈ విషయంలో కొందరు పోలీసులు హిందూపురం వైసీపీ ఎంపీ గోరంట్ల మాధవ్‌ను ఫాలో అవుతున్నారా? అన్న సందేహాలు వ్యక్తమవుతున్నాయి. ఎందుకంటే- గతంలో టీడీపీ ప్రభుత్వ హయంలో సీఐగా ఉన్న హిందూపురం ఎంపీ గోరంట్ల మాధవ్ వివాదాలకు కేరాఫ్ అడ్రస్. అప్పట్లో టీడీపీ ప్రజాప్రతినిధులు ముఖ్యంగా మాజీ ఎంపీ జేసీ దివాకర్‌రెడ్డిపై వ్యక్తిగత విమర్శలు చేసి హైలైట్ అయ్యారు. జిల్లా ప్రజానీకంలో తీవ్ర చర్చ జరిగేలా అప్పట్లో ప్రధాన ప్రతిపక్ష వైసీపీ ముఖ్యనేతల దృష్టి తనపై పడేలా వ్యవహరించారు. అందులో భాగంగానే గోరంట్ల మాధవ్ వైసీపీలో చేరడం, హిందూపురం ఎంపీగా గెలవడం వంటి పరిణామాలు చకచకా జరిగిపోయాయి. ప్రస్తుతం జిల్లాలో కొందరు పోలీసు అధికారులు... గోరంట్ల మాధవ్ పొలిటికల్ గ్రాఫ్‌ను ఫాలో అవుతున్నట్లుగా ఉందన్న చర్చ జోరుగా జరుగుతోంది.
