గ్యాస్ సిలిండర్‌పై రాష్ట్ర ప్రభుత్వం 291 రూపాయలు పన్ను వేస్తోందంటూ బీజేపీ నేతలు తప్పుడు ప్రచారం చేస్తున్నారన్న హరీష్... ఏడేళ్లు మంత్రిగా ఉన్న ఈటలకు వాస్తవాలు తెలియవా అని ప్రశ్నించారు. జీఎస్టీ వచ్చిన తర్వాత... సిలిండర్‌పై పన్ను రాష్ట్ర ప్రభుత్వ పరిధిలో లేదన్నారు హరీష్. టీఆర్ఎస్ ప్రభుత్వం పండుగ పూట వడ్డీలేని రుణం ఇస్తే, బీజేపీ మాత్రం గ్యాస్, పెట్రోల్, డీజిల్ ధరలను పెంచిందని ఆరోపించారు. హుజురాబాద్‌లో పాదయాత్ర సమయంలో గ్రైండర్లు, కుట్టుమిషన్లు, గడియారాలు పంచింది ఎవరో ప్రజలకు తెలుసన్నారు. ఈటల గెలిస్తే... ఢిల్లీ పెద్దలకు గులాం గిరి చేయాల్సిందే అన్నారు. కానీ టీఆర్ఎస్ పార్టీ మాత్రం ప్రజలకు మాత్రమే గులాంలా ఉందన్నారు. ప్రజాస్వామ్యంలో తమ పార్టీ చేసిన పనులు చెప్పుకోవాలి. లేదా ఎదుటిపార్టీ వైఫల్యాలు ఎత్తి చూపాలన్నారు హరీష్ రావు. బీజేపీని ఈటల ఓన్ చేసుకోవడం లేదని... అలాగే ఈటలను కూడా బీజేపీ ఓన్ చేసుకోవడం లేదన్నారు. బీజేపికి రాజేందర్ దూరం ఉన్నరన్న హరీష్ రావు.... కేంద్రంలోని బీజేపీ ప్రభుత్వ నిర్ణయాలకు తాను దూరం అన్నట్లు, తాను భాగం కాన్నట్లు మాట్లాడుతున్నడని ఆరోపించారు హరీష్ రావు. రాబోయే రోజుల్లో అబద్దాల ప్రచారాన్ని ప్రజలు నమ్మే పరిస్థితి లేదన్నారు హరీష్ రావు.
