తిరుపతిలో దక్షిణాది రాష్ట్రాల సీఎంలతో అమిత్ షా సమావేశమయిన అనంతరం, బీజేపీ ముఖ్య నేతలతోనూ సమావేశమయ్యారు. ఈ సమావేశంలో కీలక అంశాలపై చర్చ జరిగినట్టుగా తెలుస్తోంది. ఇందులో ముఖ్యంగా రాజధాని అమరావతి కోసం రైతులు చేపట్టిన యాత్రకు సంబంధించిన విషయాలను పార్టీ నేతలను అడిగి తెలుసుకున్నారట అమిత్ షా.. పాదయాత్రలో బీజేపీ నేతలు ఎందుకు పాల్గొనలేదని క్లాస్ పీకినట్టుగా కూడా తెలుస్తోంది. వెంటనే రాజధాని రైతుల పాదయాత్రకు మద్దతు ఇవ్వాలని బీజేపీ నేతలకు ఉపదేశమిచ్చారట అమిత్ షా. ఇప్పటికే చాలా ఆలస్యం చేశారని.. ఇకపై ఇలాంటి నిర్ణయాలు తీసుకోవద్దని కూడా చెప్పినట్టు సమాచారం.
అయితే అమిత్ షా మాటలకు ఏపీ బీజేపీ నేతలు అవాక్కయ్యారట. ఆ పాదయాత్ర టీడీపీ చేయిస్తోందని చెప్పగా.. రైతులు పాల్గొంటున్న యాత్రలో ఎవరైనా పాల్గొనవచ్చని.. అందులో రాజకీయాలకు ఆస్కారం లేదని అమిత్ షా గట్టిగానే చెప్పినట్టు సమాచారం. అమిత్ షా తీసుకున్న ఈ నిర్ణయం వెనుక పెద్ద వ్యూహమే కనిపిస్తోంది. ఇప్పటికే దేశవ్యాప్తంగా బీజేపీ ప్రభుత్వం రైతులకు వ్యతిరేకంగా పనిచేస్తుందనే ముద్ర వేయించుకుంది. వ్యవసాయ చట్టాలతో ఈ అపవాదు మరింతగా పెరిగిపోయింది. అటు తెలంగాణలో కూడా రైతులకోసం బీజేపీ, టీఆర్ఎస్ కొట్టుకుంటున్నాయి. ఈ దశలో ఏపీలో కనీసం రైతుల ఉద్యమాన్ని వాడుకుంటే.. రైతులకు సపోర్ట్ గా ఉన్నారనే పేరొస్తుందని బీజేపీ నేతల ప్లాన్. ఇదీ అసలు సంగతి..
