ఇప్పుడు తాజాగా తెలుగు రాష్ట్రాలపై కూడా మమతా బెనర్జీ దృష్టి సారించారు. 2019 ఎన్నికల్లో వైఎస్ఆర్ కాంగ్రెస్ పార్టీ కోసం పని చేసిన రాజకీయ వ్యూహకర్త ప్రశాంత్ కిషోర్ సాయం తీసుకుంటున్నారు దీదీ. ఇప్పటికే తెలుగు రాష్ట్రాల్లో అసంతృప్తి నేతలతో పీకే టీమ్ చర్చలు జరుపుతోంది. తెలంగాణలో అటు అధికార పార్టీ నేతలతో పాటు ప్రతిపక్ష కాంగ్రెస్ పార్టీ నేతలతో కూడా పీకే టీమ్ సంప్రదింపులు జరుపుతోంది. అలాగే ఏపీలో ప్రతిపక్ష టీడీపీ నేతలను కూడా కలిసినట్లు సమాచారం. అయితే ఇప్పటికే తెలుగు రాష్ట్రాల్లో పార్టీల సంఖ్య ఎక్కువగానే ఉంది. ఏపీలో తెలుగుదేశం, వైసీపీ, బీజేపీ, జనసేన పార్టీలున్నాయి. అటు తెలంగాణలో టీఆర్ఎస్, బీజేపీ, కాంగ్రెస్, టీడీపీ, బీఎస్‌పీలు ఉన్నాయి. ఈ పరిస్థితుల్లో కొత్త పార్టీని తెలుగు ప్రజలు ఆదరించే పరిస్థితి కొద్దిగా కష్టమే. ముఖ్యంగా భాషాపరమైన సమస్యలు వచ్చే అవకాశం ఉందంటున్నారు రాజకీయ విశ్లేషకులు. ఎంతోకాలంగా రాజకీయాలు చేస్తున్న పార్టీల పరిస్థితి ఏపీలో దయనీయంగా ఉంది. ప్రస్తుతం జాతీయ పార్టీ కాంగ్రెస్ పరిస్థితి అత్యంత దారుణంగా ఉంది. ఇక గత ఎన్నికల్లో బీజేపీకి కనీసం ఒక్క చోట కూడా డిపాజిట్లు దక్కలేదు. ఇక దళితుల పార్టీగా ఉన్న బీఎస్పీ కూడా సీట్లు సాధించలేక పోతుంది. పెద్ద పార్టీల పరిస్థితే ఇలా ఉంటే... ఇక టీఎంసీకి అవకాశం కష్టమే అంటున్నారు విమర్శకులు.
