జగనన్న సంపూర్ణ గృహ హక్కు పథకంలో భాగంగా 1983 నుంచి 2011 ఆగస్టు 15వ తేదీ వరకు రాష్ట్ర గృహ నిర్మాణ సంస్థ నుంచి రుణం పొందిన వారికి, ప్రభుత్వ స్థలంలో ఇళ్లు నిర్మించుకున్న లబ్దిదారులకు యాజమాన్య హక్కులు కల్పించాలని జగన్ సర్కార్ నిర్ణయించింది. ఓటీఎస్ పథకంలో భాగంగా లబ్దిదారుల రుణాలను వన్ టైమ్ సెటిల్ మెంట్ పేరుతో చెల్లించాలని ప్రభుత్వం ఆదేశించింది. అలా చెల్లించిన లబ్దిదారులకు వారి ఇంటిపై పూర్తిస్థాయి హక్కులు కల్పిస్తూ... పత్రాలను రిజిస్ట్రేషన్ చేసి ఇస్తామని కూడా జగన్ సర్కార్ హామీ ఇస్తోంది. అయితే అసలే రాష్ట్ర ప్రజల ఆర్థిక పరిస్థితి అంతంత మాత్రంగా ఉంది. కరోనా కారణంగా దాదాపు రెండేళ్లుగా ఆదాయం సగానికి సగం పడిపోయింది. ఇలాంటి పరిస్థితుల్లో జగన్ సర్కార్ నిర్ణయించిన మొత్తం కట్టేందుకు ప్రజలు ఇబ్బందులు పడుతున్నారు. దాదాపు 30 ఏళ్ల క్రితం తీసుకున్న లోన్లు ఇప్పుడు చెల్లించాలని ప్రభుత్వం ఎలా అడుగుతుందని కూడా ప్రశ్నిస్తున్నారు. ఓటీఎస్ కోసం ఎవరినీ బలవంతం చేయడం లేదని కూడా మంత్రులు సర్ది చెబుతున్నారు. అయితే ఓటీఎస్ వల్ల ప్రజలకు లాభం జరుగుతుందని కూడా చెబుతున్నారు.
