అయితే వారం రోజుల్లో పీఆర్సీ ఇస్తామన్న జగన్ మాట ఇప్పుడు అమలు కాలేదు. ఉద్యోగుల పీఆర్సీ ప్రకటన మరింత ఆలస్యం అయ్యేలా కనిపిస్తోంది. పీఆర్‌సీకి సంబంధించిన వివిధ డిమాండ్లను ఇప్పటికే ప్రభుత్వం ముందు ఉంచారు ఉద్యోగ సంఘాల నేతలు. అలాగే ఫిట్ మెంట్ విషయంలో గట్టి పట్టుదలతో ఉన్నారు. ప్రస్తుత ఆర్థిక పరిస్థితుల్లో ఉద్యోగుల డిమాండ్లు పరిష్కరించేందుకు ప్రభుత్వం వెనకడుగు వేస్తోంది. దీంతో పీఆర్సీ ప్రకటన మరింత ఆలస్యం అయ్యేలా పరిస్థితి కనిపిస్తోంది. ఇదే విషయాన్ని ప్రభుత్వ ప్రధాన సలహాదారు సజ్జల రామకృష్ణారెడ్డి కూడా స్పష్టం చేశారు. దీంతో పీఆర్సీ ప్రకటన కొత్త ఏడాదిలోనే ఉంటుందని అంతా భావిస్తున్నారు. ఉద్యోగులకు 14.29 శాతం ఫిట్ మెంట్‌తో పీఆర్సీ ఇవ్వాలని ఇప్పటికే అధికారుల కమిటీ ప్రభుత్వానికి సిఫార్సు చేసింది. అయితే దీనిపై ఉద్యోగులు తీవ్ర అసంతృప్తితో ఉన్నారు. ఇది తాము కోరుతున్న దానిలో సగం కూడా లేదంటున్నారు. దీంతో పీఆర్సీ ప్రకటన విషయంలో ప్రభుత్వం ఆచితూచి వ్యవహరిస్తోంది. తెలంగాణ ప్రభుత్వం ఇస్తున్నట్లుగా 30 శాతం ఫిట్‌మెంట్‌ ఇవ్వాలని జగన్ సర్కార్ భావిస్తోంది. దీనిపై కసరత్తు చేయాలని... ఇప్పటికే ఆర్థిక శాఖ అధికారులను సీఎం జగన్ ఆదేశించినట్లు తెలుస్తోంది.
