35 లక్షల మంది నిరుద్యోగులకు ఏదో ఒకటి చేసి ఉపాధి మార్గం చూపాలి. అందరికీ కాకపోయినా కొందరికి అయినా ప్రభుత్వం తరఫున భరో్సా ఉండాలి.ఇవేవీ లేనప్పుడు కనీసం ఇస్తామన్న 3016 రూపాయల నిరుద్యోగ భృతిని అయినా ఇవ్వాలి. ఇవేవీ కాకుండా కాలయాపన చేసి నిరుద్యోగులు నిండా ముంచుతున్నారు కేసీఆర్ అన్న అభియోగం మాత్రం ఎప్పటికప్పుడు వినిపిస్తూనే ఉంది. నిరుద్యోగం లేని తెలంగాణను ఆశించే తాము ఆ రోజు ఓయూ కేంద్రంగానో, కాకతీయ వర్శిటీ కేంద్రంగా ఉద్యమాలు తీవ్రతరం చేశామని కానీ ఇప్పుడు సొంత రాష్ట్రం వచ్చాక సొంత పాలకులే తమ పొట్ట కొడుతున్నారని సంబంధిత వర్గాలు వాపోతున్నాయి.
తెలంగాణ రాజకీయాల్లో కేసీఆర్ కు ఎదురే లేదు. ఆయనను ఢీ కొనే శక్తే లేదు. అంతగా పాతుకుపోయిన టీఆర్ఎస్ కు ఎప్పటికప్పుడు సమస్యలు వస్తూనే ఉన్నాయి.అవేవీ కంటి మీద కునుకు లేకుండా చేస్తూనే ఉన్నాయి.రాజకీయంలో అపర చాణక్య నీతిని పాటించే గులాబీ బాస్ ఎందుకనో కొన్ని విషయాల్లో దూకుడుగా లేరు.ముఖ్యంగా ఆర్థిక సంబంధ విషయాల్లో కేసీఆర్ మాత్రం అస్సలు సాహసం చేసి ఓ నిర్ణయం తీసుకోలేకపోతున్నారు.దీంతో నిరుద్యోగ సమస్య అన్నది అస్సలు పరిష్కారం కావడం లేదు. ఆ రోజు ఎన్నికల్లో ఇస్తామన్న హామీ ఇప్పటిదాకా అమల్లో లేదు.అంతేకాదు కొత్తగా ఒక్కటంటే ఒక్క నోటిఫికేషన్ కూడా లేదు. ఇస్తారన్న భరోసా కూడా ప్రభుత్వం నుంచి రావడం లేదు. ఈ దశలో కేసీఆర్ రాజకీయ ఎదుగుదలకు నిరుద్యోగ సమస్య అన్నది ముందున్న రోజుల్లో పెద్ద అవరోధం అయినా ఆశ్చర్యపోనవసరం లేదు.