హైదరాబాద్ ఎర్రగడ్డలోని మానసిక చికిత్సాలయంలో కరోనా కేసుల సంఖ్య పెరుగుతోంది. 57మంది ఇన్ పేషెంట్లకు కరోనా పాజిటివ్ రాగా.. 9మంది మంది వైద్య సిబ్బంది కరోనా బారిన పడ్డారు. దీంతో లక్షణాలు ఉన్న మరికొందరికి కరోనా టెస్టులు చేస్తుండగా.. తీవ్ర లక్షణాలున్న వారిని ఐసోలేషన్ కు తరలిస్తున్నారు.
సికింద్రాబాద్ గాంధీ ఆస్పత్రిలో కరోనా విజృంభిస్తోంది. ఆస్పత్రిలో మొత్తం 120మంది వైద్యులకు కరోనా సోకగా.. వీరిలో 40మంది పీజీ విద్యార్థులు, 38మంది హౌస్ సర్జన్లు ఉన్నారు. వీరితో పాటు 36మంది ఎంబీబీఎస్ విద్యార్థులు, ఆరుగురు ఫ్యాకల్టీకి కరోనా పాజిటివ్ గా తేలింది. ఇంకా మరికొందరి రిపోర్టులు రావాల్సిన నేపథ్యంలో కేసుల సంఖ్య మరింత పెరిగే అవకాశముంది.
మరోవైపు తెలంగాణ రాష్ట్రంలో కరోనా కేసులు పెరుగుతున్న కారణంగా ఈ నెల 30 వరకు విద్యాసంస్థలకు ప్రభుత్వం సెలవులు పొడిగించింది. దీంతో ఈ నెల 30 వరకు జరిగే అన్ని రకాల పరీక్షలను వాయిదా వేస్తున్నట్టు ఉన్నత విద్యామండలి ప్రకటించింది. ఉన్నత విద్యామండలి ఆదేశాలతో ఈ నెల 30 వరకు జరగాల్సిన సప్లిమెంటరీ, రెగ్యులర్ పరీక్షలను జేఎన్టీయూహెచ్ వాయిదా వేసింది. ఒకవేళ పరీక్షలు నిర్వహిస్తే తాము పరిగణలోకి తీసుకోబోమని జేఎన్టీయూహెచ్ స్పష్టం చేసింది.
