జనసేన తరపున 30 నియోజకవర్గాల్లో అభ్యర్థుల్ని నిలబెడతానంటున్నారు పవన్ కల్యాణ్. ప్రతి నియోజకవర్గంలో తమకు కార్యకర్తల బలం ఉందని చెప్పుకొచ్చారు. అయితే ప్రస్తుతం బీజేపీ, జనసేన పొత్తులో ఉన్నాయి. ఏపీకి మాత్రమే ఈ పొత్తు పరిమితం అనుకున్నా, తెలంగాణలో ఎలా పోటీ చేస్తారో చూడాలి. 2023లో తెలంగాణలో ఒకరిపై ఒకరు విమర్శలు చేసుకుని 2024లో ఏపీలో సయోధ్య అంటే ఎవరూ నమ్మరు. అందుకే తెలంగాణలో కూడా బీజేపీతో జనసేన కలిసి నడిచే అవకాశముంది.
టీఆర్ఎస్ పై స్టాండ్ ఏంటి..?
తెలంగాణ ఎన్నికల్లో పోటీ చేయాలంటే.. కచ్చితంగా టీఆర్ఎస్ ప్రభుత్వాన్ని విమర్శించాల్సి ఉంటుంది. టీఆర్ఎస్ పై విమర్శలు చేయాలంటే కేసీఆర్ పాలనపై వేలెత్తి చూపించాలి. కేటీఆర్ ని కూడా విమర్శించాలి. మరి పవన్ కల్యాణ్ ఇంత సాహసం చేస్తారా అనేదే అనుమానం. అసలు పవన్ కల్యాణ్ తెలంగాణలో ఎందుకు పోటీ చేయాలనుకుంటున్నారో స్పష్టంగా చెప్పలేదు. గతంలో పలు ఎన్నికలను, ఉప ఎన్నికలను వద్దనుకున్న పవన్, సడన్ గా 2023 నాటికి బరిలో దిగుతామంటే జనం ఎలా రిసీవ్ చేసుకుంటారో చూడాలి. గతంలో బీజేపీ మాటలతో పవన్ పోటీనుంచి వెనక్కి తగ్గారు. జీహెచ్ఎంసీ ఎన్నికల విషయంలో కూడా అలాగే బీజేపీకి సపోర్ట్ చేశారు. కానీ ప్రచారం చేయలేదు. ఇప్పుడు తెలంగాణలో పోటీ చేస్తానంటే బీజేపీ కేంద్ర నాయకత్వం పవన్ కల్యాణ్ ని ప్రచారానికి వాడుకుంటుందా అనే అనుమానం కూడా ఉంది. మరి పవన్ కల్యాణ్ ఆయా విషయాల్లో ఎలాంటి నిర్ణయాలు తీసుకుంటారో చూడాలి.