ప్రముఖ రాజకీయ వ్యూహకర్త ప్రశాంత్ కిషోర్ (పీకే)కి దిమ్మతిరిగి మైండ్ బ్లాంక్ అయినట్లే ఉంది. ఎందుకంటే కొన్ని రాజకీయపార్టీల విజయాల్లో భాగస్వామిగా మారగానే తానే ఒక రాజకీయనేత అవతారం ఎత్తాలని డిసైడ్ అయిపోయారు. రాజకీయవ్యూహకర్త ఎప్పటికీ వ్యూహకర్తగానే ఉండాలా ? రాజకీయ నేత అవకూడదా అంటే కాకూడదని రూలేమీలేదు. కాకపోతే మనమేంటి ? మనస్ధాయి ఏమిటనే విషయంపై బాగా అవగాహన ఉండాలి.

రాజకీయపార్టీల గెలుపోటములపై అవగాహన ఉన్న పీకే తన సొంత విషయంలో మాత్రం తప్పులో కాలేసినట్లే ఉన్నారు. ఎందుకంటే గాంధీ జయంతి అయిన అక్టోబర్ 2వ తేదీనుండి భారీఎత్తున బీహార్లో జనసురాజ్ పేరుతో పాదయాత్ర ప్రారంభించారు. ఈ విషయాన్ని చాలారోజులుగా చెబుతునే ఉన్నారు. అందుకు తగ్గట్లే పశ్చిమ చంపారన్ జిల్లాలోని గాంధీ అశ్రమం ప్రాంతంలో పెద్ద ఏర్పాట్లే చేశారు.  యాత్ర మొదలయ్యే సమయంలో పీకే స్పీచ్ ఇవ్వటానికి ఏర్పాట్లు కూడా జరిగాయి.

అన్నీ బాగానే ఉన్నాయి కానీ తీరా ముహూర్తం సమయానికి పీకే+నిర్వాహకులు తప్ప ఇంకెవరూ జనాలు కనబడలేదు. భారీ ఎత్తున జనాలు వస్తారని అవసరమైన ఏర్పాట్లు చేసినా జనాలు కనబడలేదు. దాంతో ఏం చేయాలో పీకేతో పాటు నిర్వాహకులకూ అర్ధంకాలేదు. పాదయాత్ర ప్రారంభం అవుతుందని ముందునుండే పీకే టీమ్ ఎంత హడావుడి చేసినా, ఏర్పాట్లు చేసినా తీరా యాత్ర మొదలయ్యే రోజుకు జనాలు రాలేదంటేనే పీకే కెపాసిటి ఏమిటో బయటపడింది.

ఇక్కడ విషయం ఏమిటంటే ముఖ్యమంత్రులతోను, రాజకీయనేతలతోను రాసుకుపూసుకు తిరగటం అలవాటైపోవటంతో వాళ్ళకన్నా తాను ఎందులో తక్కువ అన్న అహంకారం పీకేలో పెరిగిపోయినట్లుంది. రాజకీయ నేతలు వేరు రాజకీయ వ్యూహకర్త వేరన్న విషయాన్ని పీకే మరచిపోయారు. ఒక మామూలు కార్పొరేటర్ సభకు ఏర్పాట్లు చేసుకుంటే కూడా జనాల గేదరింగ్ బ్రహ్మాండంగా ఉంటుంది. ప్రారంభ సభ అట్టర్ ఫ్లాప్ అయితే ఇక ముందు ముందు ఇంకెలాగుంటుందో అనే టెన్షన్ నిర్వాహకుల్లో పెరిగిపోతోంది. మొత్తానికి ఏదేదో ఊహించుకుని పాదయాత్ర మొదలుపెట్టిన పీకేకి దిమ్మ తిరిగే ఉంటుంది.