నెల రోజుల క్రితం అదృశ్యమైన వ్యక్తి కేసులో మిస్టరీ వీడింది. ఓ వ్యక్తిని కిరాతకంగా హత్య చేసి.. అతని శరీరాన్ని ముక్కలు ముక్కలుగా నరికి కృష్ణా నదిలో పడేసిన ఘటన కలకలం రేపింది. ఎస్పీ ఆదేశాలతో పోలీసులు ఎట్టకేలకు కేసును ఛేదించారు. ఎన్డీఆర్ఎఫ్.. స్థానిక మత్స్యకారుల సహకారంతో శవాన్ని.. అతని బైక్‌ను కృష్ణా నదిలో కనుగొన్నారు.
గుంటూరు జిల్లా మాచవరం మండలం వేమవరానికి చెందిన మాగంటి కొండలు(38) నెల రోజుల కిందట అదృశ్యమయ్యాడు. బంధువుల ఇంటికి వెళ్లి ఉంటాడని భావించిన కుటుంబ సభ్యులు వారం రోజులపాటు వెతికారు. ఎంత వెతికినా అతని ఆచూకీ తెలియకపోవడంతో చివరకు పిడుగురాళ్ల పోలీసులకు ఫిర్యాదు చేసినట్లు తెలుస్తోంది. కొండలు కనిపించకుండా పోయి నెల రోజులైనా పోలీసులు తూతూమంత్రంగానే గాలింపు చర్యలు చేపడుతుండడంతో అతని కుటుంబ సభ్యులు గుంటూరు రూరల్ జిల్లా ఎస్పీని ఆశ్రయించారు. ఎస్పీ ఆదేశాలతో పోలీసులు కేసును సీరియస్‌గా తీసుకున్నారు. గాలింపు చర్యలు ముమ్మరం చేశారు. కొండలు కనిపించకుండా పోయిన రోజు ఏం జరిగి ఉంటుందన్న కోణంలో విచారణ చేపట్టారు.
కొండలు అదృశ్యమైన ముందు రోజు ఓ వ్యక్తితో కలిసి వెళ్లడం చూసినట్లు అనుమానం వ్యక్తం చేయడంతో ఆ దిశగా పోలీసులు దర్యాప్తు చేపట్టారు. అనుమానితులను స్టేషన్‌కి పిలిపించిన పోలీసులు కొండలు గురించి ఆరా తీశారు. తొలుత తమకేమీ తెలియదని బుకాయించిన నిందితులు.. పోలీసులు తమదైన శైలిలో విచారించడంతో కొండలును హత్య చేసి కృష్ణా నదిలో పడవేసినట్లు చెప్పినట్లు సమాచారం. సరదాగా మద్యం తాగుదామని చెప్పి కొండలును నమ్మకంగా తీసుకెళ్లారు. వేమవరం పొలాల్లోకి తీసుకెళ్లి ఫుల్లుగా మద్యం తాగించారు. అనంతరం మరికొందరితో కలిసి అతి కిరాతకంగా హత్య చేశారు. అనంతరం కాళ్లు, చేతులు నరికి దేహం నుంచి వేరుచేశారు. శవాన్ని ముక్కలు ముక్కలుగా నరికి ఓ గోనెసంచిలో మూటకట్టారు. ఆ మూటను మృతుడి బైక్‌తో కలిపి మరో పెద్ద గోతంలో చుట్టి తంగెడ సమీపంలో కృష్ణా నదిపై ఉన్న వంతెనపై నుంచి నదిలో పడేశారు.
అయితే కొండలు హత్యకు అక్రమ సంబంధాలే కారణమని పోలీసులు భావిస్తున్నారు. మృతుడికి గ్రామంలో కొందరు మహిళలతో శారీరక సంబంధాలున్నట్లు తెలుస్తోంది. ఈ నేపథ్యంలోనే కొండలును దారుణంగా హత్య చేసి ఉంటారని భావిస్తున్నారు. అత్యంత కిరాతకంగా నరికి చంపి.. శవాన్ని మాయం చేసిన ఘటన తీవ్ర సంచలన కలిగించింది. ఎవరెవరికి హత్యతో సంబంధం ఉందన్న విషయంపై పోలీసులు ఆరా తీస్తున్నారు. సత్తెనపల్లి డీఎస్పీ ఆధ్వర్యంలో విచారణ సాగుతోంది. ఇంకా నిందితులను అరెస్టు చూపలేదు. పూర్తి వివరాలు తెలియాల్సి ఉంది.
