ప్రాణాంతక కరోనా మహమ్మారి బారి నుంచి తప్పించుకునే దిశగా కీలక పురోగతి సాధించారు యూనివర్సిటీ ఆఫ్ కాలిఫోర్నియా పరిశోధకులు. నానోస్పాంజెస్ అనే కృత్రిమ కణాల్ని అభివృద్ధి చేశారు. ఇది యాంటీవైరల్ డ్రగ్ మాత్రం కాదు. కానీ.. కొవిడ్ను అడ్డుకుంటుందట. ఈ నానోస్పాంజెస్... సార్స్-కొవ్-2 వైరస్కు ఆతిథ్యమిచ్చే కణాలను ఆకర్షించి తటస్థీకరిస్తుందని పరిశోధనలో తేల్చారు. వైరస్ హోస్ట్ సెల్స్ను దాడి చేసి.. పునరుత్పత్తి చేసే సామర్థ్యాన్ని కోల్పోయేలా చేస్తుందట. దాదాపు 90 శాతం వైరస్ సంక్రమణను అడ్డుకుంటుందని నమ్మకంగా చెబుతున్నారు.ఈ నానోస్పాంజెస్ను శాన్ డియాగోలోని యూనివర్సిటీ ఆఫ్ కాలిఫోర్నియా ఇంజినీర్లు అభివృద్ధి చేయగా... బోస్టన్ యూనివర్సిటీ పరిశోధకులు ప్రయోగాలు జరిపారు.
ఆతిథ్య కణాలే టార్గెట్...
వైరస్కు ఆతిథ్యమిచ్చే ఊపిరితిత్తులు, రోగ నిరోధక వ్యవస్థ పొరలపై ఈ నానోపార్టికల్స్(చిన్న చిన్న కణాల)ను కప్పి ఉంచేలా మానవ శరీరంలోకి పంపిస్తారు. ఈ ఒక్కొక్క నానోస్పాంజ్ వెంట్రుక పరిమాణం కంటే వెయ్యిరెట్లు సూక్ష్మంగా ఉంటుంది. ఇంకా బ్యాక్టీరియాతో నశింపజేసేలా ఉండే చిన్న చిన్న కణాలు ఊపిరితిత్తులు, కణాలకు ఒక రక్షణ కవచంలా పనిచేస్తుందట. ఈ నానోస్పాంజెస్ను ప్రమాదకర వ్యాధికారక క్రిములు, వైరస్ను పీల్చివేసే విధంగా అభివృద్ధి చేశారు. రోగనిరోధక వ్యవస్థపై ప్రభావం చూపకుండా ఉంటుందో లేదో తెలుసుకునేందుకు సుదీర్ఘంగా ప్రయోగాలు జరిపి విజయవంతం అయ్యారు.
దశాబ్దాలుగా అధ్యయనం..
శాన్ డియాగో ప్రొఫెసర్ లియాంగ్ఫంగ్ ఝాంగ్.. దశాబ్దకాలంగా ఈ నానోస్పాంజెస్ గురించి పరిశోధనలు సాగిస్తున్నారు. కరోనా వైరస్ శరీరంలోకి ప్రవేశించగానే.. దానిని టార్గెట్ చేసేలా ఏదైనా సృష్టించాలనుకున్నారు. ఇప్పుడు కరోనా మహమ్మారి విజృంభిస్తున్న సమయంలో.. లోతైన పరిశోధనలు చేసి అభివృద్ధి చేశారు. బోస్టన్ యూనివర్సిటీలో పలు దశల్లో ప్రయోగాలు జరపగా.. ప్రభావవంతంగా పనిచేస్తుందని చెబుతున్నారు. దీనితో కరోనా.. తన 90 శాతం సాంక్రమికతను కోల్పోతుందని విశ్వాసం వ్యక్తం చేస్తున్నారు ఝాంగ్.
