ఈసారి కరోనా వైరస్ ప్రభావం కారణంగా అమెరికా అధ్యక్ష ఎన్నికల సన్నాహాలు, హడావుడి అంతా అతి సాధారణ స్థాయిలో ఉంటుందనుకుంటే అందుకు విభిన్నంగా గత ఎన్నికల మాదిరిగానే ఎన్నికల హడావుడి మొదలైంది. రికార్డు స్థాయిలో ముందస్తు ఓటింగ్ నమోదవుతోంది. అందులో భాగంగానే ఏకంగా అంతర్జాతీయ అంతరిక్ష కేంద్రం నుంచి ఈ ఎన్నికలకు గాను ముందస్తు ఓటు పడడం విశేషం. ఆ ఓటు వ్యోమగామి కేట్ రూబిన్స్ ది. తను అంతరిక్షం నుంచి కూడా తన ఓటు హక్కును వినియోగించుకోవడం నిజంగానే విశేషం. ఈ విషయమై స్పందిస్తూ తాను తన ఓటు హక్కును శుక్రవారం (అక్టోబర్ 23) వినియోగించుకున్నానని తెలిపారు. అక్టోబర్ 14 న ఇద్దరు రష్యన్ వ్యోమగాములతో కలిసి కేట్‌ రూబిన్స్‌ అంతరిక్ష కేంద్రంలోకి ప్రవేశించారు. ఇంటర్నేషనల్ స్పేస్ స్టేషన్ (ISS) ఓటింగ్ బూత్ లోపల కేట్ రూబిన్స్ నిల్చొని ఉన్న ఫొటోను నాసా వ్యోమగాముల ట్విట్టర్ పేజీలో పోస్టు చేశారు. ‘అంతర్జాతీయ అంతరిక్ష కేంద్రం నుంచి నేను ఈ రోజు ఓటు వేశాను’ అనే క్యాప్షన్‌తో ఆ ట్వీట్ చేశారు. కేట్‌ రూబిన్స్ స్పేస్ స్టేషన్ నుంచి ఓటు వేయడం ఇదే తొలిసారి కాదు. ఆమె 2016లోనూ అంతరిక్షం నుంచి ఓటు హక్కు వినియోగించుకోవడం విశేషం. అంతరిక్షంలో ఉన్న వ్యోమగాములు సైతం ఓటు హక్కు వినియోగించుకునేలా.. 1997లో అమెరికా కాంగ్రెస్ ఓ చట్టాన్ని ఆమోదించింది. నాటి నుంచి international Space Station నుంచి ఓటు వేసేందుకు అవకాశం కలుగుతోంది.


‘ప్రతి ఒక్కరూ తమ ఓటు హక్కు వినియోగించుకోవడం ప్రధాన విషయంగా నేను భావిస్తున్నాను. మనం అంతరిక్షం నుంచి ఓటు వేయగలిగితే, భూమి మీద నుంచి ఓటింగ్‌లో పాల్గొనడానికి ప్రజలు మరింత ఉత్సాహం చూపుతారని నా విశ్వాసం. ప్రజాస్వామ్యంలో ఓటు వేయడం చాలా ముఖ్యమైనది. అంతరిక్షం నుంచి ఓటు వేయడాన్ని నేను గౌరవంగా భావిస్తున్నాను’ అని కేట్ రూబిన్స్ అంతరిక్షం నుంచి ఓ వీడియోను విడుదల చేశారు.
హ్యూస్టన్‌లో నివసించే చాలా మంది యూఎస్ వ్యోమగాములు ‘లో ఎర్త్ ఆర్బిట్’ చిరునామాతో బ్యాలెట్ ద్వారా తమ ఓటు హక్కు వినియోగించుకున్నారు. అయితే.. ఇందుకోసం తక్కువ మందికే అనుమతి లభించింది. హరిస్ కౌంటీలోని ఒక కార్యాలయం నుంచి అంతర్జాతీయ అంతరిక్ష కేంద్రానికి ఇ-మెయిల్ ద్వారా బ్యాలెట్ పంపుతారు. ఆ ఇ-మెయిల్ బ్యాలెట్‌ను పూర్తి చేసి తిరిగి అదే చిరునామాకు ఇ-మెయిల్ చేస్తారు. ఎన్నికల అధికారులు నిబంధనలకు అనుగుణంగా ఉందో, లేదో పరిశీలించి ఆ ఓటును లెక్కలోకి పరిగణిస్తారు.


మరింత సమాచారం తెలుసుకోండి: