ప్రస్తుతం టన్ను ఇసుక ధర రూ.375 చొప్పున ఏపీఎండీసీ ద్వారా అమ్ముతుండగా.. ప్రభుత్వం ప్రతిపాదిస్తున్న మార్పుల వల్ల ఇది మరింత భారం అయ్యే అవకాశం ఉంది. కేంద్ర సంస్థ ద్వారా విక్రయాలు చేపడితే టన్నుకు గరిష్ఠంగా మరో రూ.100 చొప్పున పెరగుతుందని అంచనా. అంటే టన్ను ఇసుక రేటు 475 రూపాయలు అవుతుందని అంటున్నారు.
కొత్త ధర అమల్లోకి వస్తే 12 టన్నుల సామర్థ్యం ఉండే లారీ ఇసుక ధర అదనంగా రూ.1,200 పెరుగుతుంది. నాలుగున్నర టన్నుల ట్రాక్టర్కు రూ.450 చొప్పున పెరిగే అవకాశం ఉంది. రాష్ట్రంలో ఇసుక తవ్వకాలు, విక్రయాలకు రెండు కేంద్ర సంస్థలు ముందుకు రాగా, వీటిలో ఓ సంస్థను ప్రభుత్వం త్వరలోనే ఎంపిక చేస్తుందని సమాచారం. టన్ను ధర గరిష్ఠంగా రూ.475కి విక్రయించేలా నిబంధన రూపొందిస్తోంది. ఇది ప్రస్తుత ధర కంటే రూ.100 అదనం. రాష్ట్రంలో ఏటా సుమారు 2 కోట్ల టన్నుల ఇసుక విక్రయం జరుగుతుంది. పెరిగే ధరల ప్రకారం లెక్కిస్తే ఏటా వినియోగదారులపై రూ.200 కోట్ల భారం పడుతుంది.
పరోక్షంగా నిర్మాణాల వ్యయం ఏపీలో మరింత పెరిగే అవకాశముందని తెలుస్తోంది. ముఖ్యంగా పేద, మధ్యతరగతి వర్గాలపై ఈ భారం మరింత ఎక్కువ అవుతుంది. దీంతో కొత్త విధానంలో కూడా కొన్ని మార్పులు చేయాలని, అందరికి అందుబాటులో ఉండేలా ఇసుక రేటు నిర్ణయించాలని సామాన్యులు కోరుతున్నారు.