నిన్నటి దాకా... మేమున్నామని గుర్తించండి అనే స్థాయిలో నిలబడిన ఆ పార్టీ ఇప్పుడు అడ్రస్ లేకుండా పోయింది. తెలంగాణలో తెలుగుదేశానికి భవిష్యత్తులేదని చెప్పడానికి గ్రేటర్ ఫలితాలు తాజా ఉదాహరణగా నిలిచాయి.గతంలో 2016 లో ఒక్క సీటుకి పరిమితమయిన టీడీపీ ఇప్పుడు ఆ సీటును కూడా నిలుపుకోలేకపోయింది. అయితే టీడీపీ సీట్లు గెలిపించుకోలేకపోయిన తమకు ఓట్ల బలం ఉందని మాత్రం రుజువు అయ్యింది. తెరాస గెలిచినా చాలా స్థానాల్లో టీడీపీ రెండో స్థానం లో ఉందంటే టీడీపీ కి ఇక్కడ ఓటు బ్యాంకు ఉందని చెప్పొచ్చు.
అయితే ఇక్కడ చంద్రబాబు, లోకేష్ , బాలకృష్ణ లు ప్రచారం చేయకపోవడమే పెద్ద మైనస్ గా చెప్పుకొచ్చారు. వారు చేసుంటే కనీసం ఒకటో రెండో సీట్లు అయినా వచుండేవి అంటున్నారు. గ్రేటర్ ఎన్నికల్లో గెలుపుకోసం టీఆర్ఎస్, బీజేపీ, ఎంఐఎం పార్టీల అగ్రనేతలు స్వయంగా ప్రచారాన్ని ముందుండి నడిపించారు. ప్రత్యర్థుల వైఫల్యాలను ఎత్తిచూపుతూ సుడిగాలి పర్యటనలు చేశారు. కానీ... వందకు పైగా స్థానాల్లో పోటీ చేసిన టీడీపీ తరుపున మాత్రం ఆ పార్టీ అగ్రనాయకత్వం ప్రచారం చేయలేక పోయింది. ఓటమిని ముందే ఊహించి చంద్రబాబు నాయుడు, లోకేష్ ప్రచారంలో పాల్గొనలేదనే వాదన బలంగా వినిపిస్తోంది. మొత్తానికి తెలుగుజాతి ఆత్మగౌరవంటూ మొదలైన టీడీపీ ప్రజల విశ్వాసాన్ని నిలబెట్టుకోవడంలో ఘోరంగా విఫలమైంది.