ఇప్పటికే పార్టీ పేరును ఈసీ దగ్గర రిజిస్టర్ చేయించినట్లు తెలుస్తోంది. పార్టీ పేరును మరియు పార్టీ జెండాను రాజశేఖర్ రెడ్డి పుట్టినరోజును పురస్కరించుకుని జులై 6 న అధికారికంగా ప్రకటించనున్నట్లు ఇప్పటికే షర్మిల పార్టీలో చైర్మన్ గా వ్యవహరిస్తున్న వాడుక రాజగోపాల్ ఇటీవల ఒక ప్రకటనలో తెలిపారు. అయితే ప్రస్తుతం షర్మిల పార్టీ టార్గెట్ ఎవరన్న విషయం ఇప్పుడు రాజకీయంగా అధిక ప్రాధాన్యతను సంతరించుకుంది. అయితే షర్మిల వ్యాఖ్యలు మరియు పార్టీ పట్ల వివిధ పార్టీల నాయకుల స్పందనను బట్టి కొన్ని విషయాలు అర్ధం అవుతున్నాయి. గతంలో వైఎస్ రాజశేఖర్ రెడ్డి కాంగ్రెస్ పార్టీలో ఉన్నందున షర్మిల ప్రభావం ఆ పార్టీపై ఏమీ ఉండబోదని స్ఫష్టం అవుతోంది. కాగా ప్రస్తుతం అధికారంలో ఉన్న తెలంగాణ రాష్ట్ర సమితి కి వైఎస్ జగన్ కు మధ్యన అనుకూల సంబంధాలు ఉన్న మాట వాస్తవమే. కావున అన్నకు వ్యతిరేకంగా షర్మిల ప్రవర్తించబోదన్నది రాజకీయ విశ్లేషకుల అభిప్రాయం.
మిగిలింది భారతీయ జనతా పార్టీ మాత్రమే, షర్మిల పార్టీ ప్రధాన ఉద్దేశ్యం తెలంగాణ రాష్ట్రంలో బీజేపీని లేకుండా చేయడమే అని తెలుస్తోంది. ఆ దిశగా షర్మిల కార్యాచరణ ఉండనుందని విశ్వసనీయవర్గాల సమాచారం. ఇప్పటివరకైతే తెరాస పార్టీని ప్రశ్నించే విధంగా తన వ్యాఖ్యలు ఉన్నప్పటికీ, రానున్న రోజుల్లో బీజేపీకి చెక్ పెట్టే దిశగానే ముందుకు సాగుతుందని సమాచారం. మరి దీనికి బీజేపీ నాయకత్వం ఏ విధంగా ఎదుర్కోనుందో తెలియాల్సి ఉంది.
