అయితే తాజాగా కొండపల్లి అటవీ ప్రాంతంలో అక్రమ మైనింగ్ చేస్తున్నారని కొంత కాలంగా తెలుగుదేశం పార్టీ నేతలు ఆరోపిస్తున్నారు. దీనిని రుజువు చేస్తామని కూడా టీడీపీ నేతలు సవాల్ చేశారు. మైనింగ్ జరుగుతున్న ప్రాంతాన్ని పరిశీలించేందుకు దేవినేని ఉమా స్వయంగా వెళ్లారు. ఆ ప్రాంతాన్ని టీడీపీ కార్యకర్తలతో కలిసి పరిశీలించిన తర్వాత తిరుగు ప్రయాణమైన దేవినేని కారును జి.కొండూరు మండలం గడ్డమణుగ వద్ద వైసీపీ నేతలు అడ్డుకున్నారు, మా గ్రామానికి ఎందుకు వచ్చారంటూ నిలదీశారు. వాహనాన్ని చుట్టుమట్టి దాడి చేశారు. రాళ్లతో దాడి చేయడంతో దేవినేని ఉమా కారు అద్దాలు పూర్తిగా ధ్వంసమయ్యాయి. ఈ దాడిలో పలువురు టీడీపీ నేతలకు, కార్యకర్తలకు కూడా గాయలైనట్లు తెలుస్తోంది. గాయపడిన వారిలో ఇద్దరి పరిస్థితి విషమంగా ఉనట్లు సమాచారం. అటు ఉమాపై దాడి విషయం తెలుసుకున్న టీడీపీ నేతలు, కార్యకర్తలు, దేవినేని అభిమానులు పెద్ద ఎత్తున గడ్డమణుగ చేరుకున్నారు. దీంతో ఏ నిమిషాన ఏం జరుగుతుందో అని గ్రామస్థులు బిక్కుబిక్కుమంటు గడుపుతున్నారు. ఎలాంటి అవాంఛనీయ ఘటనలు జరగకుండా పోలీసులు భారీ ఎత్తున మోహరించారు. తనను హత్య చేసేందుకే ఎమ్మెల్యే వసంత కృష్ణ ప్రసాద్ ప్లాన్ చేశారని దేవినేని ఉమా ఆరోపిస్తున్నారు.
