పెద్దల సభ వల్ల పెద్దగా ఉపయోగం లేదని భావించిన సీఎం జగన్... శాసనమండలిని రద్దు చేయాలంటూ కేంద్రానికి ప్రతిపాదనలు కూడా పంపారు. అయితే అప్పుడే జగన్ ఆలోచనను సొంత పార్టీ నేతలే వ్యతిరేకించారు. రాజకీయ నిరుద్యోగులు చట్ట సభలకు వెళ్లాలంటే ఒకేఒక్క మార్గం శాసనమండలి. ఎన్నికల సమయంలో సీటు ఆశించి భగపడిన వారికి అన్ని పార్టీలు ఇచ్చే హామీ ఎమ్మెల్సీగా అవకాశం. ఆరేళ్ల పాటు చట్టసభలకు ప్రాతినిధ్యం వహించే అవకాశం ఉంటుంది. జగన్ నిర్ణయంతో ఆ ఆశలన్నీ అడియాశలయ్యాయి. అదే సమయంలో కొద్ది రోజులు ఆగితే చాలు... టీడీపీ నేతల కాలపరిమితి తీరిపోతుంది కాబట్టి.... మన పార్టీ వాళ్లే మళ్లీ ఎన్నికవుతారు కాబట్టి... ఎలాంటి సమస్య రాదు అని కూడా బాహాటంగానే వ్యాఖ్యానించారు కొందరు. కానీ రద్దు చేయాలనే బిల్లును కేంద్రానికి పంపడంతో జగన్ మాటకు ఎదురుచెప్పలేక మిన్నకుండిపోయారు.
కానీ ఆ బిల్లును కేంద్రం ఏడాదిన్నర కాలంగా పెండింగ్ లో పెట్టింది. ఇంతలో ఎన్నో మార్పులు చోటు చేసుకున్నాయి. మండలిలో వైసీపీ బలం క్రమంగా పెరుగుతోంది. ప్రతిపక్ష సభ్యుల కాలపరిమితి ముగియడంతో వారి స్థానంలో అధికార పార్టీ నేతలు కొలువుతీరారు. ఈ పరిస్థితుల్లో మండలి రద్దు అంశం మరోసారి చర్చనీయాంశమైంది. శాసనమండలి రద్దు అంశాన్నిరాజ్యసభలో ప్రస్తావించారు టీడీపీ ఎంపీ కనకమేడల రవీంద్రబాబు. దీనికి కేంద్ర మంత్రి కిరణ్ రిజూజ్ లిఖిత పూర్వక సమాధానం ఇచ్చారు. మండలి రద్దు చేయాలని రాష్ట్ర ప్రభుత్వం పంపిన ప్రతిపాదనలను కేంద్ర ప్రభుత్వం పరిశీలిస్తోందన్నారు. దీనిపై త్వరలోనే నిర్ణయం తీసుకుంటామన్నారు. కేంద్ర మంత్రి ప్రకటనతో కొత్తగా పదవి చేపట్టిన వారికే కాకుండా... పెద్దల సభ కోసం ఆశలు పెట్టుకున్న వారిలో భయాందోళన రేకెత్తిస్తోంది. చూద్దాం ఏం జరుగుతుందో మరి.