అయితే ప్రస్తుతం రాష్ట్రంలో రేషన్ డీలర్ల పరిస్థితి మాత్రం అగమ్యగోచరంగా మారింది. ఇంటింటికీ సరుకుల పంపిణీ వచ్చాక పూర్తిగా తమ ఆదాయాన్ని కోల్పోయారు రేషన్ డీలర్లు.. కరోనా సమయంలో ప్రాణాలకు తెగించి.. నెలలో రెండుసార్లు పంపిణీని పూర్తి చేశారు రేషన్ డీలర్లు.. పేదల ఆకలి మంటలను చల్లార్చారు. అయితే ఇందుకు వారికి రావాల్సిన కమిషన్ మాత్రం ప్రభుత్వం విడుదల చేయలేదు. దీనికి తోడు బియ్యం పంపిణీ కోసం ఉపయోగించే గోనె సంచులను కూడా ప్రభుత్వం వెనక్కు ఇచ్చేయాలని ఆదేశించడంతో ఉన్న కాస్త ఆదాయం కూడా పోయింది. ఇప్పటికే పెరిగిన ఖర్చులు, షాపు అద్దెలు, విద్యుత్ చార్జీలను మోయలేక అవస్థలు పడుతూనే రేషన్ షాపులు నడుపుతున్నారు డీలర్లు..
తాజాగా రేషన్ డీలర్లు తమకు రావాల్సిన కమిషన్ బకాయిలు చెల్లించాలంటూ ప్రభుత్వానికి పలుదఫాలుగా వినతిపత్రాలు అందజేశారు. తమ గోడు పట్టించుకోవాలంటూ అధికారుల చుట్టూ తిరిగారు. అయినప్పటికీ ఫలితం లేకపోవడంతో నేటి నుంచి ఆందోళనకు సిద్ధమవుతున్నారు. న్యాయపరమైన డిమాండ్లు పరిష్కరించేంతవరకూ స్టాక్ పాయింట్ల వద్ద నిరసన తెలపాలని నిర్ణయించారు. రేషన్ షాపుల బంద్ చేస్తున్నట్టు కూడా ప్రకటించారు. అయితే రాత్రికి రాత్రి ఏం జరిగిందో గానీ.. బంద్ లేదని.. కేవలం నిరసనలు మాత్రమే చేస్తున్నట్టు మరొక ప్రకటన విడుదల చేశారు రేషన్ డీలర్లు.. ప్రభుత్వ పెద్దల నుంచి రేషన్ డీలర్ల అసోసియేషన్ నేతలకు వచ్చిన బెదిరింపుల కారణంగానే బంద్ నిర్ణయాన్ని విరమించుకున్నట్టు మరికొందరు చెబుతున్నారు. అసలే ఇబ్బందుల్లో ఉన్న రేషన్ డీలర్లు.. అధికారులకు ఎదురెళితే.. ఉన్న ఉపాధి కూడా కోల్పోతామనే భయంతోనే బెదిరింపులకు తలొగ్గినట్టు సమాచారం.. ఏదిఏమైనా ఏపీలో రేషన్ డీలర్లకు మాత్రం న్యాయం జరగడం లేదనేది వాస్తవం.
