పరిస్థితి ఇంకా సద్దుమణగలేదు. ఈ లోపే మరో పిడుగు లాంటి వార్తను వాతావరణ శాఖ అధికారులు చెబుతున్నారు. తమిళనాడు వద్ద బంగాళాఖాతంలో మరో అల్పపీడనం ఏర్పడినట్లు విశాఖ వాతావరణ కేంద్రం అధికారులు వెల్లడించారు. దీని ప్రభావంతో చిత్తూరు, కడప, నెల్లూరు, ప్రకాశం జిల్లాల్లో భారీ నుంచి అతి భారీ వర్షాలు కురిసే అవకాశం ఉందని అధికారులు హెచ్చరిస్తున్నారు. నైరుతి బంగాళాఖాతం పరిసర ప్రాంతాల్లో ఏర్పడిన అల్పపీడనం.... పశ్చిమ వాయవ్య దిశగా కదులుతున్నట్లు వెల్లడించారు. దీని ప్రభావంతో ఈ నెల 27వ తేదీ నుంచి నాలుగు జిల్లాల్లో భారీ వర్షాలు కురుస్తాయని అధికారులు తెలిపారు. అల్పపీడన ప్రభావంతో అనంతపురం, గుంటూరు, కృష్ణా జిల్లాల్లో కూడా ఒక మోస్తరు నుంచి భారీ వర్షాలు కురుస్తాయన్నారు అధికారులు. వాతావరణ శాఖ అధికారుల హెచ్చరికలతో నాలుగు జిల్లాల ప్రజలు బెంబేలెత్తుతున్నారు. ఇప్పటికే రాష్ట్రంలోని దక్షిణ కోస్తా జిల్లాల్లో భారీ వర్షాల కారణంగా రికార్డు వర్షపాతం నమోదైంది. అతి భారీ వర్షాల నేపథ్యంలో అధికారులు మరింత అప్రమత్తమయ్యారు.
