ఆ వార్తల్లో నిజమెంత..?
మంత్రి అనిల్, రూప్ కుమార్ యాదవ్ మధ్య విభేదాలు వచ్చాయని, రూప్ కుమార్ వ్యవహార శైలి నచ్చకే మంత్రి ఆయనను దూరం పెట్టారని కథనాలు వినిపిస్తున్నాయి. ఓ సెక్షన్ మీడియా దీనిపై విపరీతంగా ఫోకస్ పెట్టింది. ఇటీవల కాలంలో మంత్రి అనిల్ కి స్థానిక నాయకులకు విభేదాలు వచ్చాయనే విషయాలను కూడా ప్రస్తావిస్తూ ఈ వ్యవహారాన్ని హైలెట్ చేస్తోంది. గతంలో జరిగిన లావేదేవీల వల్లే వారిద్దరి మధ్య పొరపొచ్చాలు వచ్చాయని, అవిప్పుడు తారా స్థాయికి చేరుకున్నాయనేది ఆ వార్తల సారాంశం. మరి దీనిలో నిజమెంతో తేలాల్సి ఉంది.
మంత్రి అనిల్, ఆయన బాబాయ్ రూప్ కుమార్ యాదవ్, ఇటీవల ఓ అధికారిక కార్యక్రమంలో పాల్గొన్నారు. వారిద్దరూ ఎక్కడా కలిసినట్టు కనిపించలేదు, అదే సమయంలో వారి మధ్య విభేదాలున్నట్టు కూడా ఎవరూ నేరుగా మాట్లాడలేదు. అసలు అనిల్ వర్గం కానీ, రూప్ కుమార్ వర్గం కానీ ఈ విషయంపై స్పందించడంలేదు. అందరూ సైలెంట్ గానే ఉంటున్నారు. ఈ దశలో మరి ఈ పుకార్లు ఎందుకో తెలియడంలేదు. సహజంగా మంత్రి అనిల్ తనపై సోషల్ మీడియాలో వచ్చే కామెంట్లపై తీవ్ర స్థాయిలో విరుచుకుపడుతుంటారు, అదే స్థాయిలో సమాధానం చెబుతుంటారు, వైరి వర్గాల నోళ్లు మూయిస్తుంటారు. కానీ ఈ విషయంలో అనిల్ కూడా సైలెంట్ గా ఉన్నారు. తనకు, తన బాబాయ్ కి మధ్య వైరం ఉందంటూ వస్తున్న వార్తల్ని ఆయన ఖండించలేదు, అలాగని సమర్థించనూ లేదు. వైసీపీ వర్గాలు మౌనంగా ఉండటంతో.. విపక్షాలు దీన్ని మరింతగా హైలెట్ చేస్తున్నాయి. మరి ఈ వివాదంపై ఎవరైనా స్పందిస్తారా..? ఎలా స్పందిస్తారు..? అనేది తేలాల్సి ఉంది.
