ప్రస్తుతం తెలుగు దేశం పార్టీకి చాలా గడ్డు పరిస్థితి నడుస్తోంది. గతంలో రెండు తెలుగు రాష్ట్రాల్లో నూ ఓ వెలుగు వెలిగిన ఆ పార్టీ ఇప్పుడు తన చరిత్రలోనే అత్యంత క్లిష్టమైన దశను ఎదుర్కొంటోంది. ఆంధ్రప్రదేశ్ లో ఘోర పరాజయం కారణంగా అధికారం కోల్పోగా..ఇక తెలంగాణలో ఆ పార్టీ ఉనికికే ప్రమాదం ఏర్పడిన దుస్థితి. ఇలాంటి పరిస్థితుల్లో ఓ ఫోటో వైరల్ గా మారుతోంది.
అదే తెలుగు దేశం బీడీలు.. కింది తరగతి శ్రామిక వర్గం ఎక్కువగా వాడే బీడీ పరిశ్రమలో తెలుగు దేశం చేరిందా అంటూ ఓ ఫోటో వైరల్ అవుతోంది. ఇక తెలుగుదేశం నేతలు ఇలా బీడీలు అమ్ముకుంటా బతకాల్సిందే అంటూ కొందరు ఆ పార్టీ వ్యతిరేకులు దీనిపై కామెంట్ చేస్తూ సోషల్ మీడియాలో వైరల్ చేస్తున్నారు. ఇక తెలుగుదేశం మళ్లీ అధికారంలోకి రావడం కల్ల అని ఆ పార్టీ నాయకులే డిసైడ్ అయ్యారని అందుకే.. ఇలా బీడీల వ్యాపారానికి దిగారని కామెంట్లు పెడుతున్నారు.
ఇక ఈ ఫోటో విషయానికి వస్తే.. తెలుగుదేశం పార్టీ రంగు పసుపులోనే ఈ బీడీ కట్టల ప్యాకెట్ ఉంది. దీనిపై తెలుగుదేశం బీడీలు అంటూ టైటిల్ ఉంది. తెలుగు దేశం పార్టీ సింబల్ అయిన ఇల్లు, నాగలి, కార్మిక చక్రం ఉన్న లోగో కూడా ఉంది. దీనికి తోడు ఈ తెలుగుదేశం బీడీల ట్రేడ్ మార్కు కూడా ఆ పార్టీ ఎన్నికల గుర్తు అయిన సైకిల్ కావడం విశేషం. ఈ బీడీ ఫ్యాక్టరీ కడపలో ఉన్నట్టు ఆ ప్యాకెట్ కవర్ తెలియజేస్తోంది.
అయితే ఇండియా హెరాల్డ్ గ్రూపు ఈ ఫ్యాక్టరీ యజమాని అబ్దుల్ ఖాదిర్‌ తో ఈ విషయంపై సంప్రదించింది. ఆయన ఏమంటున్నారంటే.. ఇది కొత్తగా పెట్టింది కాదండీ.. 2007లో ఈ తెలుగుదేశం బీడీలు ఫ్యాక్టరీని స్టాపించాం. మాకు అన్నీ లైసెన్సులు ఉన్నాయి. ఇటీవల తెలుగు దేశం పార్టీ ఓడిపోయింది కాబట్టి.. మా బీడీల ఫ్యాక్టరీ ఫోటో వైరల్ అవుతోంది. ఇది కొందరు టీడీపీ అంటే గిట్టని వారు చేస్తున్నట్టు భావిస్తున్నాం అన్నారు.
