దొరస్వామికి నటనంటే ఎంతో పిచ్చి.. ప్రాణం అనే చెప్పుకోవచ్చు. ఎందుకంటే సినిమాలపై ఉన్న మక్కువతో తన వైవాహిక జీవితాన్నే త్యజించుకున్నారు. వివాహ బంధానికి దూరంగా ఉంటూ సినిమాల్లో నటించారు. వ్యక్తిగత జీవితాన్ని త్యాగం చేయడమే కాకుండా.. తన తుది శ్వాస వరకు సినిమానే జీవితంగా బతికారు. అప్పట్లో ఆర్టిస్ట్ పాల్ దొరస్వామి అంటే తెలియని వారు లేరు. ఆయనకంటూ ప్రత్యేక గుర్తింపు ఉండేది. వందేమాతరం, సుమంగళీ వంటి సినిమాల్లో హీరోకు తండ్రిగా నటించారు. ఆ పాత్రలకు ప్రాణం పోసి ప్రేక్షకులను ఎంతగానో అలరించారు.
పాల్ దొరస్వామి సినిమాలో ఒక పాత్రలో నటిస్తున్నారంటే.. ఆ పాత్రకు పూర్తిగా న్యాయం చేసేవారు. హీరో హీరోయిన్లకు తండ్రి పాత్రలో నటించిన ఈయన.. విలన్ పాత్రల్లో కూడా ప్రేక్షకులను మెప్పించారు. ‘మల్లేశ్వరి’ సినిమాలో మల్లేశ్వరి తండ్రిగా కూడా నటించారు. ‘పెళ్లి చేసి చూడు’ సినిమాలో విలన్ పాత్రలో నటించి విమర్శకుల ప్రశంసలు పొందారు. అప్పట్లో ఆయన డేట్స్ కూడా ఖాళీగా ఉండకపోయేవి. దర్శక నిర్మాతలు ఆయన కోసం క్యూ కట్టేవారు. సహజ నటుడిగా సినీ పరిశ్రమలో మంచి గుర్తింపు తెచ్చుకున్న దొరస్వామి.. సినిమానే జీవితంగా భావించారు. ఇలాంటి డేడికేషన్ ఉన్న నటులు ఇప్పట్లో దొరకడం కష్టమనే చెప్పుకోవచ్చు.