టెస్ట్ సిరీస్ ఓడిపోయిన కేవలం ఇరవై నాలుగు గంటల్లోనే టెస్ట్ కెప్టెన్సీ కి ముగింపు పలుకుతున్నా అంటూ విరాట్ కోహ్లీ సోషల్ మీడియా వేదికగా తెలిపాడు. దీంతో ఇక కోహ్లీ తర్వాత టెస్ట్ ఫార్మాట్ కెప్టెన్ ఎవరు అన్నదానిపై ప్రస్తుతం గందరగోళ పరిస్థితి నెలకొంది. ఇదే విషయంపై స్పందిస్తూ ఎంతో మంది మాజీ ఆటగాళ్లు తమ అభిప్రాయాలను వ్యక్తం చేస్తూ ఉండటం గమనార్హం. ఇటీవలే మాజీ ఆటగాడు సునీల్ గవాస్కర్ ఈ విషయంపై స్పందిస్తూ ఆసక్తికర వ్యాఖ్యలు చేశాడు. విరాట్ కోహ్లీ లాగా ఫిట్ గా ఉంటూ అన్ని మ్యాచ్లకు అందుబాటులో ఉండే ఆటగాడికి బీసీసీఐ తర్వాత కెప్టెన్గా అవకాశం ఇవ్వాలి అంటూ సునీల్ గవాస్కర్ చెప్పుకొచ్చాడు
భారత జట్టును నడిపించాలంటే కెప్టెన్ కి ఫిట్నెస్ ఎంతో ముఖ్యం.. అయితే ప్రస్తుతం టెస్ట్ కెప్టెన్సీ రేసులో సీనియర్ ఆటగాడు రోహిత్ శర్మ ముందంజలో ఉన్నాడు. గత కొన్ని రోజుల నుంచి అతని ఫిట్నెస్ సమస్య తీవ్రంగా వేధిస్తోంది.. ఇటీవల తొడ కండరాలు గాయం కారణంగా సౌత్ ఆఫ్రికా పర్యటనకు కూడా దూరమయ్యాడు. ఇక భవిష్యత్తులో కూడా ఇది పునరావృతం అయ్యే అవకాశం కూడా లేకపోలేదు. అతడికి టెస్ట్ కెప్టెన్సీ పగ్గాలు అప్పగిస్తే సమర్థవంతంగా ముందుకు నడిపించగలడా అనే అనుమానం కలుగుతోంది. అందుకే టీమిండియా భవిష్యత్తును దృష్టిలో పెట్టుకుని కోహ్లీ లాగా ఎంతో ఫిట్ గా ఉంటూ సుదీర్ఘకాలంపాటు కెప్టెన్ గా కొనసాగే ఆటగాడిని కెప్టెన్సి ఇస్తే బాగుంటుంది అని సునీల్ గవాస్కర్ అభిప్రాయం వ్యక్తం చేశాడు.