రాను రాను రోడ్డు ప్రమాదాల తీవ్రత పెరుగుతూనే ఉంది. ఈ ప్రమాదాలను నివారించేందుకు ఆంధ్రప్రదేశ్ రాష్ట్ర ముఖ్యమంత్రి వైఎస్ జగన్మోహన్ రెడ్డి సంచలన నిర్ణయం తీసుకున్నారు. ఇక ఎవరైనా వాహనదారులు నిబంధనలు ఉల్లంఘిస్తే షాక్ కొట్టే రీతిలో ఫైన్‌లు విధించాలని నిర్ణయించారు. ఈ మేరకు బుధవారం ఏపీ ప్రభుత్వ పిన్సిపల్ సెక్రటరీ కృష్ణబాబు జీవో జారీ చేశారు.

ఈ జీవో ప్రకారం.. ఇకపై బైక్ లు(ద్విచక్ర వాహనాలు), ఆటోలు, క్యాబ్‌ల నుంచి 7 సీటర్ కార్ల వరకూ ఒకే విధమైన జరిమానా విధించనున్నట్లు జగన్ సర్కార్ ప్రకటించింది. ఎవరైనా సెల్‌ఫోన్ మాట్లాడుతూ డ్రైవింగ్ చేయడం, ప్రమాదకర డ్రైవింగ్‌కు రూ.10,000, రేసింగ్‌లో మొదటిసారి పట్టుబడితే రూ.5 వేలు, రెండో సారికి రూ. 10 వేల జరిమానా విధించనున్నట్లు ఉత్తర్వుల్లో ప్రభుత్వం పేర్కొంది. రిజిస్ట్రేషన్, ఫిట్‌నెస్ సర్టిఫికెట్ లేకుండా మొదటిసారి పట్టుబడితే రూ. 2 వేలు, రెండోసారి పట్టుబడితే రూ.5 వేలు జరిమానా విధించనున్నట్లు ఏపీ ప్రభుత్వం వెల్లడించింది. అలాగే పర్మిట్ లేని వాహనాలు నడిపితే రూ.10 వేలు, ఓవర్‌లోడ్‌కు రూ. 20 వేలు జరిమానా విధించాలని ప్రభుత్వం నిర్ణయించింది. పదే పదే నిబంధనలు ఉల్లంఘిస్తే డ్రైవింగ్‌ లైసెన్స్‌ రద్దు చేయనున్నట్లు ఉత్తర్వుల్లో పేర్కొంది.

జరిమానాలు ఇలా..
  • # వాహనాల చెకింగ్ విధులకు ఆటంకం కలిగిస్తే: రూ.750
  • # సమాచారం ఇచ్చేందుకు నిరాకరిస్తే: రూ.750
  • # అనుమతి లేని వ్యక్తులకు వాహనం ఇస్తే: రూ.5,000
  • # అర్హత కంటే తక్కువ వయసున్న వారికి వాహనం ఇస్తే: రూ.5,000
  • # డ్రైవింగ్ లైసెన్స్‌కు అర్హత లేని వారికి వాహనం ఇస్తే: రూ. 10,000
  • # నిబంధనలకు వ్యతిరేకంగా వాహనాల్లో మార్పులు చేస్తే: రూ.5,000
  • # వేగంగా బండి నడిపితే: రూ. 1,000
  • # సెల్ ఫోన్ డ్రైవింగ్, ప్రమాదకర డ్రైవింగ్: రూ. 10,000
  • # రేసింగ్ మొదటిసారి: రూ. 5,000,  రెండో సారి: రూ. 10,000
  • # రిజిస్ట్రేషన్ లేకున్నా, ఫిట్నెస్ సర్టిఫికేట్ లేకుంటే మొదటిసారి: రూ. 2,000, రెండో సారి రూ. 5,000
  • # పర్మిట్ లేని వాహనాలు వాడితే : రూ. 10,000
  • # ఓవర్ లోడ్ : రూ.20,000 ఆపై టన్నుకు రూ. 2,000 అదనం
  • # వాహనం బరువు చెకింగ్ కోసం ఆపక పోయినా: రూ. 40,000
  • # అంబులెన్స్, ఫైర్ ఇంజన్ వంటి ఎమర్జెన్సీ వాహనాలకు దారి ఇవ్వకుంటే : రూ. 10,000
  • # అనవసరంగా హారన్ మోగిస్తే: మొదటిసారి రూ. 1,000, రెండోసారి రూ. 2,000
  • # రూల్స్ కి వ్యతిరేకంగా మార్పు చేర్పులు చేస్తే తయారీ సంస్థలకు లేదా డీలర్లకు, అమ్మినినవారికి: రూ. 1,00,000 (లక్ష)

మరింత సమాచారం తెలుసుకోండి: