ప్రతి ఒక్కరూ చిన్నతనం నుంచి మంచి ఉద్యోగాన్ని, అనుకున్న లక్ష్యాలను సాధించాలని కలలు కంటారు. కొందరు ఆ కలలను నిజం చేసుకుని అనుకున్న లక్ష్యాలను సాధిస్తారు. మరికొందరు మాత్రం కెరీర్ విషయంలో చేసే చిన్నచిన్న తప్పుల వల్ల జీవితంలో ఉన్నత స్థానాలకు ఎదగలేకపోతుంటారు. మారుతున్న పోటీ ప్రపంచంలో లక్ష్యాలను సాధించాలంటే ఎంతో కష్టపడాలి. సక్సెస్ కు షార్ట్ కట్ ఉండదని ఎల్లప్పుడూ గుర్తుంచుకోవాలి.
జీవితంలో కొన్నిసార్లు మన అంచనాలకు తగిన ఉద్యోగం దొరక్కపోవచ్చు. అందువల్ల జీతం తక్కువైనా ఆ అనుభవం ఉపయోగపడుతుందంటే ఉద్యోగంలో చేరడం ఉత్తమం. ఉద్యోగం చేయకుండా సమయాన్ని వృథా చేసుకోవడం వల్ల ఎటువంటి ప్రయోజనం ఉండదు. చాలా మంది సాధించే సత్తా ఉన్నప్పటికీ ప్రేమ, ఆకర్షణ, చెడు అలవాట్ల వల్ల కెరీర్ ను నాశనం చేసుకుంటూ ఉంటారు.
కెరీర్ లో ఎంతో విలువైన సమయాన్ని అనవసర వ్యాపకాల వల్ల వృథా చేసుకుంటే జీవితాంతం బాధ పడాల్సి ఉంటుంది. కెరీర్ కు ప్రథమ ప్రాధాన్యత ఇస్తే జీవితంలో మిగతా వాటిని సులభంగా సాధించే అవకాశం ఉంటుంది. కెరీర్ లో ఎదగాలంటే ధనం విషయంలో జాగ్రత్త వహించాలి. కొన్ని సందర్భాల్లో మన దగ్గర ఎక్కువ డబ్బు ఉండవచ్చు. ఆ సమయంలో ఎక్కువ డబ్బు ఉందని వృథా చేస్తే డబ్బు లేని సమయంలో ఇబ్బందులు పడాల్సి ఉంటుంది. అందువల్ల చిన్నతనం నుంచే డబ్బు విషయంలో జాగ్రత్త వహించాలి. మంచి ఉద్యోగం దొరకలేదని సమయం వృథా చేసుకోవడం, ఆకర్షణలకు... చెడు అలవాట్లకు లోనవ్వడం, డబ్బు విషయంలో అజాగ్రత్త వహించడం లాంటి తప్పులు చేయకపోతే కెరీర్ లో విజయం సాధించడం కష్టమేమీ కాదు.
