జీవితంలో ప్రతి రోజూ ప్రతి ఒక్కరూ సక్సెస్ అనే మాటను వింటూ ఉంటారు. అందరూ సక్సెస్ కోసం కష్టపడతారు. కానీ కొందరు మాత్రమే సక్సెస్ అవుతారు. ఎవరైతే కష్టపడతారో... లక్ష్య సాధన దిశగా నిరంతరం కృషి చేస్తారో వారు మాత్రమే సక్సెస్ అవుతారు. అనవసర విషయాలపై మనస్సును మళ్లించకుండా లక్ష్యం కోసం ప్రయత్నిస్తే విజయం సాధించడం కష్టమేమీ కాదు. సాధారణంగా ప్రతి మనిషికి కొన్ని విషయాల మీద, అలవాట్ల మీద కంట్రోల్ ఉండదు.
కానీ తగిన సాధన చేసి మనసును పూర్తిగా మన కంట్రోల్ లోకి తెచ్చుకుంటే మాత్రం ఏ పనిలోనైనా సులభంగా విజయం సాధించవచ్చు. స్వర్గం లాంటి జీవితాన్ని మనం పొందాలంటే తప్పనిసరిగా మనస్సును మనం మచ్చిక చేసుకోవాలి. మన మనస్సు మన మాట వింటే మాత్రమే మన లక్ష్యాలను మనం సులభంగా సాధించే అవకాశం ఉంటుంది. కొన్ని పనులు చేయడం ద్వారా మనం మనస్సును అదుపులో ఉంచుకోవచ్చు.
సాధారణంగా శ్వాసకు, మనస్సుకు చాలా దగ్గరి సంబంధం ఉంటుంది. ఒత్తిడిలో ఉన్న సమయంలో లాంగ్ బ్రీత్ తీసుకుంటే మెదడు రిలాక్స్ కావడంతో పాటు ఆలోచనలు కూడా ఒక పద్ధతిలో వస్తాయి. ప్రతిరోజూ పది నిమిషాల పాటు మనం మన ఆలోచనలను గమనించాలి. మనకు వచ్చే ఆలోచనలలో ఎన్ని ఆలోచనలు మన లక్ష్యానికి సంబంధించినవో గమనించాలి. మన మనస్సు వీలైనంత సమయం ఆ లక్ష్యానికి సంబంధించిన వాటినే ఊహించుకోవాలి.
ఇలా చేస్తే ఆలస్యంగానైనా మంచి ఫలితాలు తప్పక సొంతమవుతాయి. వారంలో ఒక రోజు కొన్ని గంటల పాటు మౌనంగా ఉండటానికి ప్రయత్నించాలి. ఇలా చేస్తే జీవితంలో సక్సెస్ కావడంతో పాటు ఆనందాన్ని కూడా సొంతం చేసుకోవచ్చు. మనస్సును కంట్రోల్ లో ఉంచుకోవడం ద్వారా గొప్ప జీవితాన్ని సొంతం చేసుకోవచ్చు.
