మనం అంటే నచ్చని వ్యక్తులకు, మనం ఏం మాట్లాడినా, ఏం చేసినా వారికి ఎక్కువగా తప్పే కనిపిస్తుంది. కాబట్టి ఇటువంటి వారితో ఎంత తక్కువ మాట్లాడితే అంత మంచిది. కానీ మన మంచి కోరుకునే వ్యక్తులతో మాత్రం చాలా జాగ్రత్తగా వ్యవహరించాలి. వారిని ఇబ్బంది పెట్టే మాటలు మాట్లాడి వారిని దూరం చేసుకోకూడదు. మనకు బాధ కలిగింది కదా అని ఆలోచించకుండా టక్కున ఏదో ఒకటి అనడం వలన మనకే నష్టం వాటిల్లుతుంది. మనల్ని ఇష్టపడుతూ మనం బాగుండాలని కోరుకునే వారిని మన మాటలతో సంతోష పెట్టక పోయినా పర్వాలేదు కానీ, కష్టం మాత్రం కలిగించకూడదు.
నరం లేని నాలుకకు అడ్డూ అదుపూ ఉండదంటారు పెద్దలు. మంచి చెడులను ఎరిగిన మనిషి మాట్లాడే ముందు ఆలోచించాలి. నాలుకను అదుపులో పెట్టుకోవడం నేర్చుకోవాలి. సందర్భం ఏదైనా సమయస్ఫూర్తితో వ్యవహరించాలి. అప్పుడే మనం అనుకున్న వ్యక్తులు ఎప్పటికీ మనకు దగ్గరగానే ఉంటారు. అదే విధంగా మనల్ని అభిమానించే వారి సంఖ్య పెరుగుతుంది. సమాజంలో బ్రతుకుతున్నాం కాబట్టి మనకంటూ కొందరు మనుషులు మన పక్షాన నిలబడేవారు ఉండాలి. అలా జరగాలంటే పై విషయాలను తప్పక పాటించాల్సి ఉంటుంది.