ఇంతకుముందు, కన్వీనర్ కోటా సీట్లలో 85% తెలంగాణ స్థానిక విద్యార్థులకే దక్కేవి. మిగిలిన 15% సీట్లు స్థానికేతరులకు (నాన్-లోకల్) కేటాయించేవారు. ఈ కోటాలోనే వేలాది మంది ఏపీ విద్యార్థులు సీట్లు దక్కించుకునేవారు. కానీ, ఈ విద్యా సంవత్సరం నుంచి ఆ 15% నాన్-లోకల్ సీట్లు ఇప్పుడు కేవలం 'తెలంగాణ మూలాలు' ఉన్నవారికే దక్కుతాయి. అంటే, తల్లిదండ్రులు తెలంగాణలో కేంద్ర, రాష్ట్ర ప్రభుత్వ ఉద్యోగాలు చేస్తున్నా, లేదా తెలంగాణకు చెందినవారై ఇతర రాష్ట్రాల్లో ఉంటున్నా... అలాంటి వారికే ఈ అవకాశం. ఒక్క మాటలో చెప్పాలంటే, తెలంగాణ బ్యాక్‌గ్రౌండ్ లేని ఏపీ విద్యార్థులకు ఇకపై ఈ 15% కోటాలో నో ఎంట్రీ.
గతంలో ప్రతీ ఏటా ఈ 15% నాన్-లోకల్ కోటా ద్వారా సుమారు 3,500 నుంచి 4,000 మంది ఏపీ విద్యార్థులు తెలంగాణ ఇంజనీరింగ్ కాలేజీల్లో అడ్మిషన్లు పొందేవారు. కానీ ఇప్పుడు ఆ దారి మూసుకుపోయింది. ఈ మార్పుతో తెలంగాణ విద్యార్థులకు మంచి ఛాన్స్ దొరికినట్టే. నిపుణుల అంచనా ప్రకారం, టాప్ కాలేజీల్లో కట్-ఆఫ్ ర్యాంకులు కూడా పెరిగే అవకాశం ఉంది.
ఇంకో రూల్ కూడా విద్యార్థులకు ఇబ్బందికరంగా మారింది. అదేంటంటే, తెలంగాణ స్థానిక విద్యార్థిగా గుర్తింపు పొందాలంటే, చివరి ఏడేళ్లలో కనీసం నాలుగేళ్లు (అంటే, 6వ తరగతి నుంచి ఇంటర్మీడియట్ వరకు) తెలంగాణలోనే చదివి ఉండాలి. చాలా మంది ఏపీ విద్యార్థులు పదో తరగతి వరకు ఏపీలో చదివి, ఇంటర్ కోసం హైదరాబాద్ వస్తున్నారు. కానీ, వాళ్లు తెలంగాణలో చదివింది రెండేళ్లే కాబట్టి, స్థానికులుగా పరిగణించబడరు. దీంతో, వాళ్లకు మంచి ర్యాంకులు వచ్చినా లోకల్ కోటాలో సీట్లు దక్కించుకోలేకపోతున్నారు.
ఇక్కడో ఆసక్తికరమైన విషయం ఏంటంటే, ఈఏపీసెట్‌లో టాప్ ర్యాంకులు కొట్టిన చాలా మందికి జేఈఈ మెయిన్స్‌లోనూ అదిరిపోయే ర్యాంకులు వచ్చాయి. ఉదాహరణకు, రామచరణ్ రెడ్డి (ఈఏపీసెట్ 2వ ర్యాంకర్) జేఈఈ మెయిన్స్‌లో 53వ ర్యాంక్ సాధించగా, హేమసాయి సూర్యకార్తీక్ (3వ ర్యాంకర్) 75వ ర్యాంక్ కొట్టేశారు. వీరిలో చాలా మంది మే 18న జరిగే జేఈఈ అడ్వాన్స్‌డ్ రాసి, ఐఐటీలు లేదా ఎన్‌ఐటీలలో సీటు కొట్టాలని చూస్తున్నారు.
అయితే, కొంతమంది విద్యార్థులు కేవలం ప్రాక్టీస్ కోసమే తెలంగాణ ఈఏపీసెట్ రాశారని, అడ్మిషన్ కోసం కాదని అధికారులు చెబుతున్నారు. ముఖ్యంగా విజయవాడ కార్పొరేట్ కాలేజీలకు చెందిన చాలా మంది ఏపీ విద్యార్థులు, సరైన లోకల్ ఎలిజిబిలిటీ లేకపోయినా, దగ్గర్లోని కోదాడ, సత్తుపల్లి సెంటర్లలో పరీక్ష రాసినట్లు తెలుస్తోంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి