నేచురల్ స్టార్ నాని హోస్ట్ చేస్తున్న బిగ్ బాస్ సీజన్ 2 ఊపందుకుంది. ఇప్పటి వరకు ఎలిమినేష్ అయిన వారిలో..సంజన, నూతన్ నాయుడు, కిరీటి, శ్యామల, భానుశ్రీ, తేజస్విలు ఉన్నారు. ఈ మద్య వైల్డ్ కార్డు ఎంట్రీ తో పూజా రామచంద్రన్ ఎంట్రీ ఇచ్చింది. ఇదిలా ఉంటే..ఇప్పటికే ఎలిమినేషన్ అయిన వారిని.. మళ్లీ ఒక్కర్ని వైల్డ్ కార్డ్ ఎంట్రీ ద్వారా బిగ్ బాస్ హౌస్‌కి తీసుకుని వచ్చేందుకు ఓటింగ్‌ను షురూ చేయడంతో ఎలిమినేట్ కంటెస్టెంట్స్ బిగ్ బాస్ హౌస్‌కి రీ ఎంట్రీ ఇచ్చేందుకు ఉబలాటపడుతున్నారు.
ఇప్పటికే సామాజిక మాధ్యమాల ద్వారా ప్రమోషన్స్‌ను వేగవంతం చేశారు కంటెస్టెంట్స్. అంతే కాదు తేజస్వి ఆర్మీ, కౌశల్ ఆర్మీల పేరుతో సోషల్ మీడియాలో పెద్ద వార్ నడుస్తోంది. ఇదిలా ఉంటే ఈ మద్య జంబలకిడిపంబ, w/oరామ్ నటులు బిగ్ బాస్ లో సందడి చేశారు. తాజాగా విజయ్ దేవరకొండ నటించిన ‘గీతా గోవిందం' మూవీ ఆగస్టు 15న విడుదల కాబోతోంది. సినిమా ప్రమోషన్లలో భాగంగా విజయ్ దేవరకొండ హీరోయిన్ రష్మికతో కలిసి బిగ్ బాస్ హౌస్‌లోకి ఎంట్రీ ఇవ్వబోతున్నారట.
బిగ్‌బాస్ ఇంట్లోకి సినిమా ప్రమోషన్ల సమయంలో సెలబ్రిటీలు వస్తుంటారు, పోతుంటారు... ఇందులో వెరైటీ ఏముంది? అనుకుంటున్నారా? మామూలుగా వెళితే ఎవరూ షాకవ్వరు, కానీ బట్టల్లేకుండా వెళితే ఎవరు మాత్రం షాకవ్వకుండా ఉంటారు.‘రౌడీ' పేరుతో తన సొంత దుస్తుల బ్రాండ్ లాంచ్ చేసిన విజయ్... ఇటీవల హైదరాబాద్‌లో భారీ ఎత్తున సన్‌డౌనర్ పార్టీ ఏర్పాటు చేశారు.
కెఎల్ఎం ఫ్యాషన్ మాల్‌కు కూడా విజయ్ బ్రాండ్ అంబాసిడర్‌గా ఉన్న సంగతి తెలిసిందే. మొత్తానికి మూవీ ప్రమోషన్‌ తో పాటు ‘రౌడీ వేర్’ ప్రమోషన్‌కి షర్ట్ లేకుండా బిగ్ బాస్ హౌస్‌కి వచ్చి‘రౌడీ వేర్’ బ్రాండ్‌ని ప్రమోట్ చేయనున్నాడట విజయ్ దేవరకొండ.
