వెర్సటైల్ యాక్టర్ ఆది హీరోగా షైనింగ్ పిక్చర్స్ బ్యానర్ మీద మహిధర్ రెడ్డి, రాజశేఖర్ అన్నభిమోజు నిర్మించిన చిత్రం ‘శంబాల : ఎ మిస్టిక్ వరల్డ్’. ఈ మూవీకి యుగంధర్ ముని దర్శకత్వం వహించారు. ఈ సినిమాకు శ్రీ చరణ్ పాకాల సంగీతాన్ని అందించారు. ఈ చిత్రాన్ని డిసెంబర్ 25న భారీ ఎత్తున రిలీజ్ చేయబోతోన్నారు. ఇప్పటి వరకు ‘శంబాల’ నుంచి వచ్చిన ప్రతీ కంటెంట్ ఆడియెన్స్‌ని ఆకట్టుకున్నాయి. ఇక ఈ క్రమంలో ప్రమోషన్స్‌లో భాగంగా హీరోయిన్ అర్చన ఐయ్యర్ మీడియాతో ముచ్చటించారు. ఈ క్రమంలో ఆమె చెప్పిన సంగతులివే..

మీ నేపథ్యం గురించి చెప్పండి?
నేను తెలుగమ్మాయినే. మాది చిత్తూరు జిల్లానే. కానీ విద్యాభ్యాసం అంతా బెంగళూరులోనే జరిగింది. నా మాతృభాష తెలుగే.

‘శంబాల’ ప్రీమియర్లకు వస్తున్న రెస్పాన్స్ గురించి చెప్పండి?
‘శంబాల’కు మంచి స్పందన వస్తోంది. వేసిన ప్రతీ ప్రీమియర్ హౌస్ ఫుల్ అవుతోంది. చాలా చోట్ల ఆడియెన్స్‌ భయపడిపోతున్నారు.

దేవి పాత్ర గురించి చెప్పండి?
‘శంబాల’లో నా పాత్రను ఆడియెన్స్ బాగా ఆదరిస్తున్నారు. నేను కనిపించిన ప్రతీ సారి ఆడియెన్స్ హ్యాపీగా ఫీలవుతున్నారు. ఆదితో నా కాంబినేషన్ సీన్లకు మంచి రెస్పాన్స్ వస్తోంది. ఇప్పటికే చాలా మంది దర్శకులు ఫోన్ చేసి అభినందిస్తున్నారు.

‘శంబాల’ కథను డైరెక్టర్ చెప్పినప్పుడు మీకు ఎలాంటి ఫీలింగ్ కలిగింది?
‘శంబాల’ నెరేషన్ పూర్తిగా వినకుండానే ఓకే చేశాను. ఇందులో స్క్రీన్ ప్లే అద్భుతంగా ఉంటుంది. రొమాంటిక్ పాటలు, స్టెప్పులు వేసే పాత్ర కాదని ముందే చెప్పారు. ఇలాంటి డిఫరెంట్ పాత్ర నా కెరీర్ ఆరంభంలోనే రావడం ఆనందంగా ఉంది.

‘శంబాల’ విషయంలో నిర్మాతల సపోర్ట్ గురించి చెప్పండి?
మా నిర్మాతలు మాకెంతో సపోర్ట్ చేశారు. మధ్యలో బడ్జెట్ పెరిగినా కూడా ఎక్కడా కాంప్రమైజ్ కాకుండా ‘శంబాల’ని గ్రాండ్‌గా నిర్మించారు. మా ఆర్టిస్టులందరినీ ఎంతో బాగా చూసుకున్నారు. వారిచ్చిన సహకారంతోనే అందరం బాగా నటించగలిగాం.

ఆది గారితో వర్క్ ఎక్స్‌పీరియెన్స్ గురించి చెప్పండి?
ఆది గారితో వర్క్ చేయడంతో చాలా విషయాల గురించి తెలుసుకున్నాను. ఆయనెంతో డౌన్ టు ఎర్త్. ఎంతో తక్కువ మాట్లాడతారు. అద్భుతంగా నటిస్తారు. చాలా మంచి వ్యక్తి. ఈ ప్రయాణంలో నాకెంతో అండగా నిలబడ్డారు. ఆయనతో మళ్లీ మళ్లీ నటించాలని అనుకుంటున్నాను.

ఆడియెన్స్ అభిరుచి చాలా మారింది కదా?
ప్రస్తుతం ఆడియెన్స్ రెగ్యులర్ చిత్రాల్ని చూడటానికి అంతగా ఇష్టపడటం లేదు. కొత్త కంటెంట్ ఉంటేనే, ఇంట్రెస్టింగ్ ఎలిమెంట్ ఉంటేనే ఆడియెన్స్ థియేటర్లకు వస్తున్నారు. కరోనా తరువాత ఆడియెన్స్ అభిరుచి మారిపోయింది. నాకు ఇంత మంచి సినిమా, పాత్ర రావడం ఆనందంగా ఉంది.

‘శంబాల’ ఎలా ఉండబోతోంది?
‘శంబాల’ ప్రారంభమైన ఐదు నిమిషాల్లోనే ఆ ప్రపంచంలోకి వెళ్తారు. ఇలాంటి చిత్రాన్ని థియేటర్లో చూస్తేనే ఆ వైబ్, ఆ ఫీలింగ్ వస్తుంది. విజువల్‌గా, సౌండ్ పరంగా చాలా గొప్పగా ఉంటుంది. అన్ని రకాల ఎమోషన్స్‌ను టచ్ చేస్తూ తీసిన ఈ చిత్రం ఈ క్రిస్మస్‌కి సరైన ఆప్షన్ అని అనుకుంటున్నాను.

తదుపరి చిత్రాల గురించి చెప్పండి? ఫ్యూచర్‌లో ఎలాంటి పాత్రల్ని ఎంచుకోవాలని అనుకుంటున్నారు?
ప్రస్తుతం పీపుల్స్ మీడియా ఫ్యాక్టరీలో ఫ్యాంటసీ మూవీని చేస్తున్నాం. అది ఓ 500 ఏళ్ల క్రితం జరిగే కథ. చాలా భారీ ఎత్తున నిర్మిస్తున్నారు. ఎప్పుడూ కూడా నాకు కంఫర్ట్‌గా ఉండే రోల్స్‌ను ఎంచుకుంటాను. స్టోరీకి తగ్గట్టుగా పాత్ర డిమాండ్ చేస్తే రొమాంటిక్ సీన్లను కూడా చేస్తాను. ఛాలెంజింగ్ రోల్స్ చేయాలనే కోరిక ఉంటుంది. మంచి చిత్రాలను చేయాలని, మంచి కథల్ని చెప్పాలని అనుకుంటున్నాను.

సినీ ప్రయాణంలో పేరెంట్స్ సపోర్ట్ గురించి చెప్పండి?
నా తల్లిదండ్రుల సపోర్ట్ లేకపోతే నేను ఈ స్థాయికి వచ్చేదాన్ని కాదు. మా అమ్మ, అన్న ఎప్పుడూ నాతోనే ఉంటారు. నా పాత్రల ఎంపికలో వారి ప్రాధాన్యం కూడా ఉంటుంది. నా కలలకు ఎప్పుడూ సపోర్ట్ చేస్తుంటారు.

ఇప్పటి వరకు సినిమా చూసిన వారు మీకు ఇచ్చిన కాంప్లిమెంట్స్ గురించి చెప్పండి?
‘శంబాల’ ప్రీమియర్లు చూసిన వారంతా కూడా నా పాత్రని చూసి షాక్ అవుతున్నారు. థియేటర్ నుంచి బయటకు వచ్చాక నన్ను చూసే దృక్పథం మారిపోతోంది. ఇలాంటి పాత్రలు కెరీర్‌లో మళ్లీ మళ్లీ రావు. జీవితంలో ఒకేసారి ఇలాంటి పాత్రలు వస్తుంటాయి. నా కెరీర్ ఆరంభంలోనే ‘శంబాల’ లాంటి చిత్రం, దేవి లాంటి పాత్ర రావడం నా అదృష్టం.

‘శంబాల’ గురించి ఫైనల్‌గా చెప్పండి?
‘శంబాల’ చిత్రానికి వస్తున్న ఆదరణ చూస్తుంటే నాకెంతో సంతోషంగా ఉంది. ప్రీమియర్లకు వస్తున్న స్పందన చూసి టీం ఫుల్ ఖుషీగా ఉంది. ‘శంబాల’ అందరినీ ఆకట్టుకునేలా ఉంటుంది.
మరిన్ని ఇంట్రెస్టింగ్ అప్ డేట్స్ కోసం wa క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి

మరింత సమాచారం తెలుసుకోండి:

shambala

Reddy P Rajasekhar

24/12/2025 09:30 PM