తెలుగుదేశం అనుకూల వాదనల ప్రకారం, 2025, ఏప్రిల్ ఆంధ్రప్రదేశ్ ఆర్థిక చరిత్రలో ఒక మైలురాయి. ఏకంగా రూ.3,354 కోట్ల జీఎస్టీ వసూళ్లతో రాష్ట్రం సరికొత్త శిఖరాన్ని అందుకుందని, జీఎస్టీ వ్యవస్థ అమల్లోకి వచ్చిన తర్వాత ఇదే అత్యధికమని బల్లగుద్ది చెబుతున్నారు. ఇది కేవలం పన్నుల శాఖ సమర్థతకు నిదర్శనం కాదని, రాష్ట్ర ఆర్థిక వ్యవస్థ ఎంత పటిష్టంగా ఉందో చాటి చెబుతోందని ప్రచారం ఊపందుకుంది.
2024, డిసెంబర్‌లో కాస్త వెనుకబడినా, తిరిగి పుంజుకుని రికార్డులు బద్దలు కొట్టామని, పన్ను ఎగవేతలపై ఉక్కుపాదం మోపడం, రిటర్నుల సక్రమ దాఖలు, బకాయిల వసూళ్లలో కఠినంగా వ్యవహరించడం వల్లే ఈ 'జీఎస్టీ సునామీ' సాధ్యమైందని వివరిస్తున్నారు. పన్ను చెల్లింపుదారుల సంఖ్య పెరగడం, ఐజీఎస్టీ సెటిల్మెంట్లు కూడా రికార్డు స్థాయిలో రావడం శుభపరిణామమని, భవిష్యత్తు మరింత ఆశాజనకంగా ఉంటుందని ధీమా వ్యక్తం చేస్తున్నారు.
ఇందుకు పూర్తి భిన్నమైన వాదన వినిపిస్తోంది. సంఖ్యాపరంగా రూ.3,354 కోట్లు గొప్పగా కనిపిస్తున్నా, అసలు చూడాల్సింది వృద్ధి రేటు అని విశ్లేషకులు, వైకాపా వర్గాలు ఎత్తి చూపుతున్నాయి. గత ఏడాది ఏప్రిల్‌లో వసూలు చేసిన రూ.4,850 కోట్లతో పోలిస్తే, ఈ ఏడాది వచ్చిన రూ.4,686 కోట్లు వాస్తవానికి 3 శాతం తక్కువని స్పష్టం చేస్తున్నారు.
ఇదే సమయంలో జాతీయ సగటు జీఎస్టీ వృద్ధి 12 శాతానికి పైగా ఉండగా, పొరుగున ఉన్న తెలంగాణ (+12%), తమిళనాడు (+13%), కర్ణాటక (+11%) రెండంకెల వృద్ధితో దూసుకుపోతున్నాయని గుర్తు చేస్తున్నారు. దేశంలో మైనస్ వృద్ధి నమోదు చేసిన అతి కొద్ది రాష్ట్రాలైన మిజోరాం (-28%), త్రిపుర (-7%) సరసన ఆంధ్రప్రదేశ్ (-3%) చేరడం అత్యంత బాధాకరమని, ఇది రాష్ట్ర ఆర్థిక దుస్థితికి అద్దం పడుతోందని ఆరోపిస్తున్నారు.
కొత్త ప్రభుత్వం వచ్చి 10 నెలలు గడిచినా, ఏడు నెలల్లో జీఎస్టీ వృద్ధి రుణాత్మకంగానే ఉందని, సంక్షేమ పథకాల నిలిపివేత వల్ల ప్రజల కొనుగోలు శక్తి తగ్గిపోయిందా లేక ప్రభుత్వ ఆర్థిక విధానాలు విఫలమయ్యాయా అన్నది తేలాలని నిలదీస్తున్నారు.
ఒకే జీఎస్టీ గణాంకాలపై ఈ విరుద్ధ కథనాలు, విశ్లేషణలు సామాన్యులకు మాత్రం అంతుచిక్కడం లేదు. ఒకవైపు రికార్డుల మోత అంటూ సంబరాలు చేసుకుంటుంటే, మరోవైపు ప్రమాద ఘంటికలు మోగుతున్నాయన్న వాదనలు వినిపిస్తున్నాయి. ఈ అంకెల గారడీ వెనుక ఉన్న అసలు ఆర్థిక వాస్తవాలు ఏమిటన్నది తేలాల్సి ఉంది. రాష్ట్ర ఆర్థిక ప్రగతికి సంబంధించిన ఈ గందరగోళం ప్రజల్లో మాత్రం తీవ్ర చర్చనీయాంశంగా మారింది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి