పోహా... అటుకుల పులిహోర తరహాలోనే ఉండే వంటకం. అయితే రుచి మాత్రం దాని కంటే భిన్నంగా.. అద్భుతంగా ఉంటుంది. ఇందులో ఉన్న ఆరోగ్య ప్రయోజనాల వల్ల చాలామంది రోజూ దీన్ని బ్రేక్‌ఫాస్ట్‌గా తీసుకోవడం అలవాటు చేసుకుంటున్నారు. దేశంలో అత్యధిక ప్రజలకు ఇష్టమైన, ఉత్తమ బ్రేక్‌ఫాస్ట్ పోహానే. దీన్ని మనం అటుకుల ఉప్మా అని కూడా అనుకోవచ్చు. ఈ బిజీలైఫ్‌లో కొందరికి కనీసం బ్రేక్‌ఫాస్ట్ తినేందుకు కూడా సమయం చిక్కడం లేదు. ఈ నేపథ్యంలో పోహాను చాలా తక్కువ సమయంలోనే తయారు చేసేసుకోవచ్చు. ఇందుకు మీ ఇంట్లో అటుకులు, నిమ్మకాయ, పోపులు, పల్లీలు అందుబాటులో ఉంటే చాలు కేవలం 10 నిమిషాల్లో పోహా తయారవుతుంది. రుచికి రుచి, ఆరోగ్యానికి ఆరోగ్యం అందించే పోహా తయారీ విధానం గురించి తెలుసుకుందాం.

కావల్సిన పదార్థాలు:

అటుకులు- 1 కప్పు,
కొత్తిమీర - కొద్దిగా,
కరివేపాకు- 2 రెమ్మలు,
నిమ్మరసం -2 టేబుల్ స్పూన్స్
జీలకర్ర- 1/2 టీస్పూన్,
వెల్లుల్లి ముక్కలు- 1/2 టీస్పూన్,
పసుపు- 1/4 టీస్పూన్,
పచ్చిమిర్చి- 3,
పెద్ద ఉల్లిపాయ- 1/2,
వేరుశెనగలు (పల్లీలు)- 2 టేబుల్ స్పూన్స్ ,
పచ్చి బఠాణి -3 టేబుల్ స్పూన్స్,
ఉప్పు -తగినంత

తయారీ విధానం:

ముందుగా అటుకులను శుభ్రమైన నీటితో కడగండి. ఆ తర్వాత నీరు లేకుండా నెమ్మదిగా పిండి పక్కన పెట్టండి. మీ ఇంట్లో జల్లెడలాంటి పాత్ర ఏదైనా ఉంటే నీరు ఇంకే వరకు అందులో పెట్టవచ్చు. ఇది కేవలం ఆప్షన్ మాత్రమే. అది లేకపోయినా పర్వాలేదు.
ఇప్పుడు స్టవ్‌పై పెనం పెట్టి తగినంత నూనె వేడి చేయండి.
ఆ తర్వాత జీలకర్ర, వేరుశెనగ పప్పు, పచ్చి మిర్చి, పసుపు, వెల్లుల్లి ముక్కలు, కరివేపాకు వేసి వేయించాలి.
చివర్లో ఉలిపాయ ముక్కలు, పచ్చి బఠాణిలు వేసి కాసేపు వేయించండి.
❂ ఇప్పుడు కడిగి పక్కన పెట్టుకున్న అటుకులను అందులో వేసి బాగా కలపండి. అటుకులు వేగేప్పుడు స్టవ్ ఆన్‌లోనే ఉండాలి.
నిమ్మరసంలో తగినంత ఉప్పు వేసి కలపండి. ఆ మిశ్రమాన్ని అటుకుల్లో వేయండి.
❂ నిమ్మరసం అంతా అటుకుల్లో బాగా కలిసేలా కలపండి.
అంతే, గుమగుమలాడే.. పోహా రెడీ!
ఈ అటుకుల్లో పచ్చి టమోటా, కొత్తి మీర గార్నిష్ చేసుకుంటే టేస్ట్ ఇంకా బాగుంటుంది.
పోహాలో మిక్చర్ వేసుకుంటే కరకరలాడుతూ మరింత టేస్టీగా ఉంటుంది.
నిమ్మకాయ కలపకుండా కూడా పోహాను తయారు చేసుకోవచ్చు. దీన్ని మార్నింగ్ బ్రేక్‌ఫాస్ట్‌గానే కాకుండా ఈవినింగ్ స్నాక్స్‌గా కూడా తినొచ్చు.