ఈ సినిమాలో విధినిర్వహణ పరంగా ఎంతో కఠినంగా ఉండే పోలీస్ అధికారి పరశురాం పాత్రలో చిరంజీవి కనిపించగా ఓ చిన్న దొంగ పాత్రలో శ్రీదేవి ఆకట్టుకున్నారు. ఈ సినిమాలో నీలి చిత్రాల కేసును పరశురాం దర్యాప్తు చేస్తుంటాడు. అందులో తన తమ్ముడు కూడా ఉన్నాడని తెలిసిన పరశురాం తన తమ్ముడిని సైతం అరెస్టు చేసేందుకు వెనుకాడడు. అందులో రాణి పాత్రలో శ్రీదేవి నటించారు. ఈ పాత్ర కూడా ఈ కేసులో ఇరుక్కుంటుంది. ఆ తరువాత రాణి సాక్షిగా ఉండేందుకు ఒప్పుకుంటుంది. దాంతో ఆమెపై కొందరు దుండగులు దాడి చేస్తారు. అదే సమయంలో రాణి పాత్ర కళ్లు పోగొట్టుకుంటుంది. ఆ తరువాత పరశురాం ఆమెను వివాహమాడతాడు. విలన్స్ మాత్రం పరశురాం కుటుంబాన్ని నాశనం చేయాలని ప్రయత్నిస్తుంటారు. వారి నుంచి తన కుటుంబాన్ని ఎలా కాపాడుకున్నాడు, నేరస్థులను ఎలా పట్టుకున్నాడన్నదే మిగతా కథ.
అయితే ఈ సినిమా అంతా కూడా చాలా అద్భుతంగా వచ్చింది. కానీ ఈ సినిమా పర్వాలేదు అన్న టాక్ అందుకోవడానికి కొన్ని కారణాలను పరుచూరి గోపాలకృష్ణ తెలిపారు. ఈ సినిమాలో శ్రీదేవి కళ్ళు పోయినట్లు చూపించడం, శ్రీదేవి ఒక పిల్లాడి తల్లి పాత్రలో కనిపించడం అనేవి ప్రేక్షకులు జీర్ణించుకోలేక పోయారు. ఆమె ఎప్పటికీ వారికి అతిలోక సుందరి, కలల రాకుమారి అటువంటి శ్రీదేవికి కళ్లు పోయినట్లు, తల్లి పాత్రలో చూపించడం ఈ సినిమాపై భారీ ప్రభావం చూపాయని ఆయన చెప్పారు.