కర్నూలు జిల్లాలో చోటుచేసుకున్న ఘోర బస్సు ప్రమాదం దేశవ్యాప్తంగా తీవ్ర చర్చకు దారితీసింది. ఈ ఘటనలో ప్రాణాలు కోల్పోయిన కుటుంబాలపై అనిర్వచనీయ విషాదం నెలకొంది. దీపావళి పండుగను ముగించుకుని హైదరాబాద్ నుంచి బెంగళూరుకు బయలుదేరిన అనేకమంది ప్రయాణికులు తమ గమ్యస్థానాలకు చేరకముందే విషాదమయిన అగ్ని ప్రమాదానికి గురయ్యారు. అందుతున్న సమాచారం ప్రకారం, వీ  కావేరి ట్రావెల్స్ కి చెందిన వోల్వో బస్సు కర్నూలు సమీపంలోని  రోడ్డుపై వేగంగా వెళ్తున్న సమయంలో ఓ బైక్‌ను ఢీకొట్టింది. ఆ ఢీకొట్టుడుతో బైక్ బ్లాస్ట్ అవడంతో, మంటలు ఒక్కసారిగా బస్సుకు వ్యాపించాయి. ఆ మంటలు క్షణాల్లోనే బస్సు మొత్తాన్ని చుట్టేసి, ప్రయాణికులకు తప్పించుకునే అవకాశం లేకుండా చేశాయి. క్షణాల్లోనే బస్సు భస్మమైపోయింది.

అధికారులు వెల్లడించిన వివరాల ప్రకారం, ప్రమాదానికి గురైన బస్సుDD 01 N 9490 నంబర్‌తో రిజిస్టర్ అయి ఉంది. ఈ బస్సు పూర్తి ఫిట్ కండిషన్‌లో ఉన్నట్లు, ఎలాంటి మెకానికల్ లోపం లేనట్లు రవాణా శాఖ స్పష్టం చేసింది. అయితే, డ్రైవర్ అధిక వేగంతో నడపడం వల్లే ప్రమాదం జరిగినట్లు అధికారులు తేల్చారు. ఇక ఈ బస్సు గత చరిత్రను పరిశీలిస్తే మరింత సంచలన విషయాలు బయటపడుతున్నాయి. తెలంగాణ రాష్ట్రంలోనే ఈ ఒక్క బస్సుపై దాదాపు 16 కేసులు నమోదు అయ్యాయని సమాచారం. అలాగే 2024 జనవరి 27 నుంచి 2025 అక్టోబర్ 9 వరకు ఈ బస్సు ట్రాఫిక్ నిబంధనలను 16 సార్లు ఉల్లంఘించినట్లు కూడా రికార్డులు చెబుతున్నాయి. అంతేకాదు, తొమ్మిది సార్లు “నో ఎంట్రీ జోన్లలో” ప్రవేశించినట్లు వివరాలు వెల్లడయ్యాయి. అంటే, ఈ బస్సు గతంలో ఎన్నో సార్లు ప్రమాదకర పరిస్థితుల్లో నడపబడిందన్నమాట.

ఇది మాత్రమే కాదు. 2018 మేలో రిజిస్ట్రేషన్ పొందిన ఈ బస్సుకు 2030 వరకు టూరిస్ట్ పర్మిట్ జారీ చేయబడింది. కానీ ఈ మధ్యకాలంలో బస్సు డ్రైవర్ మరియు మేనేజ్‌మెంట్ తరఫున జరిగిన అనేక ట్రాఫిక్ ఉల్లంఘనలు, లైసెన్స్ మరియు ఫైన్‌ల మేనేజ్‌మెంట్ వ్యవహారాలు కూడా అనుమానాస్పదంగా మారాయి. పలుసార్లు ఫైన్‌లు విధించినా, అవి డబ్బులు ఇచ్చి “మేనేజ్” చేశారనే ఆరోపణలు ఇప్పుడు బలంగా వినిపిస్తున్నాయి .ఇక ప్రజలు సోషల్ మీడియాలో వ్యక్తం చేస్తున్న ఆగ్రహం మరింత తీవ్రంగా ఉంది. “ఇది కేవలం కావేరి ట్రావెల్స్ బస్సుకే పరిమితం కాదు. ఇలాంటి స్పీడ్ రైడింగ్, నిబంధనల ఉల్లంఘన అనేవి చాలామంది ప్రైవేట్ ట్రావెల్స్‌లో కామన్‌గా మారాయి,” అని నెటిజన్లు మండిపడుతున్నారు.

ప్రైవేట్ ట్రావెల్స్ కంపెనీలు ప్రయాణికులకు వేగంగా గమ్యస్థానానికి చేర్చాలనే పేరుతో హైవేల్లో వేగంతో బస్సులు నడపడం అలవాటుగా మార్చుకున్నాయన్నది ప్రజల వాదన. ప్రయాణంలో కొన్ని నిమిషాలు ఆలస్యం అయితే, ఆ టైంను కవర్ చేయాలనే ఉద్దేశంతో డ్రైవర్లు మరింత వేగం పెంచడం, ప్రయాణికుల ప్రాణాలను సైతం సాహసంగా తాకట్టుపెట్టడం జరుగుతోందని ఆగ్రహం వ్యక్తమవుతోంది.ఇప్పుడు సోషల్ మీడియాలో “కావేరి ట్రావెల్స్” పేరు ట్రెండింగ్‌లోకి వచ్చింది. ఈ బస్సు చరిత్ర, దానిపై నమోదైన కేసులు, రిజిస్ట్రేషన్ వివరాలు, ట్రాఫిక్ ఉల్లంఘన రికార్డులు వంటి అంశాలు ఒక్కొక్కటిగా బయటకు వస్తున్నాయి. అధికారులు పూర్తి స్థాయి దర్యాప్తు చేపట్టగా, బాధ్యులపై కఠిన చర్యలు తీసుకోవాలని ప్రజలు డిమాండ్ చేస్తున్నారు.ఈ ఘటనతో మరోసారి స్పష్టమైంది — ట్రాఫిక్ నియమాలు కేవలం కాగితాలపై ఉన్నంతవరకే కాకుండా, వాటిని కచ్చితంగా అమలు చేయడం ఎంత ముఖ్యమో. ఎందుకంటే ఒక డ్రైవర్ నిర్లక్ష్యం, ఒక మేనేజ్‌మెంట్ తప్పిదం — డజన్ల కొద్ది అమాయక ప్రాణాలను బలితీసుకుంటుంది.