కొత్త డిమాండ్లు: ఒక్కో జిల్లాకు ఒక్కో చిక్కు! ప్రతిపాదనల్లో కీలకమైన మార్పులు చర్చకు వస్తున్నాయి: పల్నాడు-ప్రకాశం గొడవ: ప్రకాశం జిల్లాలో మార్కాపురంను జిల్లా కేంద్రంగా చేయాలన్న ఆలోచనతో చంద్రబాబు ఉన్నారు. ఇందులో దర్శి, కనిగిరి, గిద్దలూరు, ఎర్రగొండపాలెం వంటి నియోజకవర్గాలు ఉండనున్నాయి. అన్నమయ్య జిల్లా: ఈ జిల్లాలో మదనపల్లెకు పొరుగున ఉన్న పుంగనూరు, పీలేరు, తంబళ్లపల్లె మండలాలను చేర్చాలన్న ప్రతిపాదన ఉంది. ఆదివాసీ గర్జన: రంపచోడవరం, చింతూరు మండలాలతో కలిపి కొత్త ఆదివాసీ జిల్లా ఏర్పాటు చేయాలన్న డిమాండ్ బలంగా ఉంది. గతంలో పోలవరం ముంపు ప్రాంతాలన్నింటితో ఓ జిల్లా ఏర్పాటు చేస్తామని టీడీపీ హామీ ఇచ్చింది.
పరిపాలనా సౌలభ్యం కోసం ఒక అసెంబ్లీ నియోజకవర్గం ఒకే జిల్లాలో ఉండాలనీ, హెడ్‌క్వార్టర్స్‌కు దూరం 125 కి.మీ. మించకుండా ఉండాలన్న సూచనలు ఉన్నాయి. ఈ నేపథ్యంలోనే నూజివీడును ఏలూరు నుంచి ఎన్టీఆర్‌కు, కైకలూరును కృష్ణా జిల్లాలో కలపడం, గూడూరును నెల్లూరుకు మార్చడం వంటి ప్రతిపాదనలు వస్తున్నాయి. ముఖ్యంగా, విజయవాడలో కలిసిపోయిన పెనమలూరు నియోజకవర్గానికి జిల్లా కేంద్రం మచిలీపట్నంలో ఉండటం ఏమిటన్న సామాన్య ప్రశ్న తలెత్తుతోంది. పేరు మార్పుల వదంతులు: ముంచుకొస్తున్న వివాదాలు! .. జిల్లాల పేర్ల మార్పు కూడా మరో పెద్ద వివాదాంశంగా మారుతోంది. ఏ పేర్లు పెడతారన్న దానిపై అనేక వదంతులు వచ్చినా, ఏదీ ఫైనల్ కాలేదు. కానీ ఈ విషయాల్లో ఎంతగా నాన్చితే... అంతగా ప్రాంతీయ డిమాండ్లు, కులపరమైన వివాదాలు పెరిగే అవకాశం ఉంది.
ప్రస్తుతం రెవెన్యూ శాఖ రిపోర్టును ముఖ్యమంత్రికి సమర్పించనుంది. కేబినెట్ సమావేశంలో చర్చించి, డిసెంబర్‌లోపు దీనికి సంబంధించిన జీవోలు జారీ చేయాలని ప్రభుత్వం యోచిస్తోంది. ప్రజలు, రాజకీయ పార్టీల అభిప్రాయాలను పరిగణనలోకి తీసుకుంటామని మంత్రులు హామీ ఇస్తున్నా... ఇక్కడ అసలైన సమస్య జనాభా లెక్కల తర్వాత రాబోయే నియోజకవర్గాల పునర్విభజన. ఇప్పుడు జిల్లాలను పునర్వ్యవస్థీకరించినా, భవిష్యత్తులో నియోజకవర్గాల పునర్విభజన ప్రక్రియ పూర్తయితే, మళ్లీ జిల్లాల మ్యాప్‌ను మార్చాల్సి రావొచ్చు. ఇది పరిపాలనను సులభతరం చేస్తుందా, లేక రాజకీయ చిక్కుముడులను సృష్టిస్తుందా అన్నది వేచి చూడాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి