ഏപ്രിൽ 15 വരെയുള്ള ലോക്ക് ഡൗൺ കാലയളവിൽ മൊബൈൽ പ്ലാൻ വാലിഡിറ്റി അവസാനിക്കുന്ന എല്ലാ ബിഎസ്എൻഎൽ മൊബൈൽ പ്രീപെയ്ഡ് വരിക്കാർക്കും ഏപ്രിൽ 20 വരെ സൗജന്യമായി വാലിഡിറ്റി നീട്ടി നൽകും എന്ന് ബിഎസ്എൻഎൽ അറിയിച്ചു. കോവിഡ്-19 രോഗ പ്രതിരോധ പ്രവര്‍ത്തനങ്ങളുടെ ഭാഗമായി രാജ്യത്ത് ലോക്ക് ഡൗണ്‍ പ്രഖ്യാപിച്ച സാഹചര്യത്തില്‍ വരിക്കാർക്ക് സഹായഹസ്തം നീട്ടി സർക്കാരിന്റെ ഉടമസ്ഥതയിലുള്ള ടെലികോം കമ്പനിയായ ഭാരതിയ സഞ്ചാർ നിഗം ലിമിറ്റഡ്.

 

  കേന്ദ്ര കമ്മ്യൂണിക്കേഷന്‍സ് മന്ത്രി രവിശങ്കര്‍ പ്രസാദ് ബിഎസ്എന്‍എല്‍ ചീഫ് ജനറല്‍ മാനേജര്‍മാരും പിഎംജിമാരുമായി നടത്തിയ വീഡിയോ കോണ്‍ഫറന്‍സില്‍ ബിഎസ്എന്‍എല്‍ സിഎംഡി പ്രവീണ്‍ കുമാര്‍ പുര്‍വാറാണ് ഇത് സംബന്ധിച്ച പ്രഖ്യാപനം നടത്തിയത്. ഇത് കൂടാതെ ഈ കാലയളവില്‍ അക്കൗണ്ട് സീറോ ബാലന്‍സ് ആകുന്ന ഉപഭോക്താക്കള്‍ക്ക് പത്തു രൂപയുടെ ടോക്ക് ടൈം സൗജന്യമായി നല്‍കുന്നതാണ്.

 

   ലോക്ക് ഡൗൺ കാലയളവിൽ എല്ലാ പ്രീപെയ്ഡ് വരിക്കാർക്കും തടസമില്ലാത്ത സേവനങ്ങൾ ലഭിക്കുന്നു എന്ന് ഉറപ്പുവരുത്തുന്നതിനായി വാലിഡിറ്റി കാലയളവ് നീട്ടുന്നത് ഉൾപ്പെടെ ആവശ്യമായ നടപടികൾ സ്വീകരിക്കാൻ ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) എല്ലാ ടെലികോം ഓപ്പറേറ്റർമാരോടും ഇക്കഴിഞ്ഞ ഞായറാഴ്ച ആവശ്യപ്പെട്ടിരുന്നു. അതിനുതൊട്ടുപിന്നാലെയാണ് ബിഎസ്എൻഎല്ലിന്റെ നീക്കം.

 

  ബാലൻസ് പൂജ്യമായ വരിക്കാർക്ക് മാത്രമേ സൗജന്യ ടോക്ക്ടൈം ലഭ്യമാകൂ. ഏപ്രിൽ 17 വരെ 100 മിനിറ്റ് സൗജന്യ കോളുകളും 100 എസ്എംഎസുകളുമാണ് ജിയോ യഥാസമയത്ത് റീചാർജ് ചെയ്യാൻ കഴിയാത്ത ഉപയോക്താക്കൾക്കായി നൽകുക. വാലിഡിറ്റി കഴിഞ്ഞാലും വരിക്കാർക്ക് ഇൻകമിംഗ് കോളുകൾ തുടർന്നും ലഭിക്കും.

 

  വൊഡാഫോൺ ഐഡിയ, റിലയൻസ് ജിയോ, എയർടെൽ തുടങ്ങിയ കമ്പനികളും തങ്ങളുടെ പ്ലാനുകളുടെ വാലിഡിറ്റി വർധിപ്പിച്ചിട്ടുണ്ട്. കൂടാതെ ഈ വരിക്കാർക്കെല്ലാം വേണ്ടപ്പെട്ടവരുമായി കോളിലൂടെയും എസ്എംഎസിലൂടെയും ബന്ധപ്പെടാൻ എയർടെൽ അഡീഷണലായി 10 രൂപ ടോക്ക് ടൈമും ഇവരുടെ പ്രീപെയ്ഡ് അക്കൗണ്ടിലേക്ക് ക്രെഡിറ്റ് ചെയ്യും.

 

  ഏതാണ്ട് എൺപത് മില്യണിലധികം വരിക്കാരുടെ പ്രീപെയ്ഡ് പാക്കിന്റെ വാലിഡിറ്റി ഭാരതി എയർടെൽ ഏപ്രിൽ 17 വരെ നീട്ടിയിട്ടുണ്ട്. ഇതിനുമുൻപ് തങ്ങളുടെ പാക്കിന്റെ വാലിഡിറ്റി അവസാനിച്ചാലും ഈ വരിക്കാർക്കെല്ലാം ഏപ്രിൽ 17 വരെ തങ്ങളുടെ എയർടെൽ നമ്പറിൽ ഇൻകമിങ് കോളുകൾ ലഭിക്കും. 

మరింత సమాచారం తెలుసుకోండి: